சகோதரி அமைப்பு மற்றும் திருநங்கை கல்கி

Indiaglitz இணையதளத்திற்கு நர்த்தகி திரைப்படத்தில் நடிப்பது குறித்து என் பேட்டி

2011-04-29T09:00:00.001-07:00

வரன் பார்க்க அரவாணிகள் தொடங்கியுள்ள இணையம்

2011-03-15T08:09:00.000-07:00

அரவாணிகளும் பெண்கள்தான், மதிப்புக்குரிய பெண்கள். அவர்களுக்கும் திருமணம் செய்து, கணவருடன் வாழ வேண்டும், சமூகத்தில் அந்தஸ்துடன் உலவ வேண்டும் என்ற ஆசை இருக்கும். அப்படிப்பட்டவர்களின் ஆசையைப் பூர்த்தி செய்ய திருநங்கை கல்கி புதிய இணையதளம் ஒன்றைத் தொடங்கியுள்ளார்.

www.thirunangai.net என்ற பெயரில் கல்கி தொடங்கியுள்ள இந்த இணையதளம், அரவாணிகளுக்கு வரன் பார்க்கும் அருமையான வேலையை செய்கிறது.

கல்கி - பொள்ளாச்சியில் நடுத்தர குடும்பத்தில் பிறந்தவர். தந்தை லாரி தொழிலில் ஈடுபட்டிருந்தார். 2 சகோதரிகள். கல்கி மட்டுமே வீட்டின் ஒரே ஆண் வாரிசு.

கொடைக்கானலில் போர்டிங் பள்ளியில் சேர்ந்து படித்தார்.
சிறு வயதிலேயே தனது சகோதரிகளுடன் அதிக நேரத்தை செலவிட விரும்பாமல் ஆண்களுடனேயே செலவிட விரும்பினார். தனக்குள் ஏற்பட்ட மாற்றங்களை அவர் உணர ஆரம்பித்தார். மேலும், அழகான பெண்களை விட துணிச்சலான, உறுதியான பெண்கள்தான் இவரை அதிகம் கவர்ந்தனர்.

13 வயதில் இவரது மனதுக்குள் அலையடித்த உணர்வுகளின் போராட்டத்தை தாயார் கண்டுபிடித்தார். கவலை கொண்டார்.

பள்ளிப் படிப்பிலிருந்து ஒரு நாள் விலகி முழுமையான திருநங்கையாக தன்னை மாற்றிக் கொள்ள முடிவு செய்தார் கல்கி. 14 வயதில் அரவாணிகள் குடும்பத்தில் இணைந்தார். இன்று கல்கி, சகோதரி பவுண்டேஷன் அமைப்பின் நிறுவனர் - இயக்குநர்.

இவர் உருவாக்கியுள்ள திருநங்கை.நெட் இணையதளம், அரவாணிகளுக்கு வரன் பார்த்துத் தரும் வேலையைத் தொடங்கியுள்ளது.

வெளிநாடுகளில் அரவாணிகளுக்கு திருமணம் என்பது சர்வசாதாரண விஷயம். ஆனால் இந்தியாவில் இது மிக மிக கடினமான ஒன்றாக உள்ளது. குறிப்பாக அரவாணிகளுக்கு மாப்பிள்ளைகள் கிடைப்பது என்பதும், தேடுவதும் சாதாரண விஷயமல்ல. பல தடைகள், இடையூறுகள், சிக்கல்கள் குறுக்கே நிற்கின்றன.

இதுவே கல்கி தனி இணையதளம் தொடங்க முக்கியக் காரணம். இதுகுறித்து கல்கி கூறுகையில், நிறைய ஆண்களுக்கு திருநங்கைகளுடன் பழக வேண்டும் என விருப்பம் உள்ளது. ஆனால் கல்யாணம் என்று வரும்போது மறுத்து விடுகிறார்கள்.

எங்களது சமூகத்தைச் சேர்ந்த திருநங்கைகளுக்கு நல்ல ஆண்களைக் கல்யாணம் செய்து குடும்பமாக வசிக்க வேண்டும் என்ற ஆசை உள்ளது. சமூகத்தில் கெளரவத்தோடு வாழ வேண்டும் என்பதே அவர்களின் ஆசை.

சமூகத்தின் விளிம்பு நிலையில் உள்ளவர்கள் அரவாணிகள். அப்படிப்பட்டவர்களுக்கான தளம்தான் இந்த திருநங்கை.நெட்.

எங்களது இணையதளம் மூலம் வரன்களைத் தேடிக் கொள்ளலாம், நல்ல ஆண் துணைவர்களைத் தேடிக் கொள்ளலாம்.

எல்லோருக்கும் போலவே எங்களுக்கும் காதல் வரும். நல்ல கணவன் வேண்டும் என்ற ஆசையம் வரும். எங்களால் குழந்தை பெற்றுக் கொள்ள முடியாது என்றாலும், குழந்தைகளைத் தத்தெடுத்துக் கொண்டு அந்தக் குழந்தையுடனும், கணவருடனும் இயல்பான வாழ்க்கை வாழ முடியும் என்றார்.

தற்போது இந்த இணையதளத்தில் சில அரவாணிகள் தங்களுக்கு வரன் தேவை என்று கோரி விண்ணப்பித்துள்ளனர்.

இந்த அரவாணிகளை கல்யாணம் செய்து கொள்ள விரும்பியும், துணைவிகளாக்கிக் கொள்ளவிரும்பியும், இந்தியா, ஐரோப்பா, அமெரிக்கா, மத்திய கிழக்கு நாடுகள் உள்ளிட்டவற்றிலிருந்து 200க்கும் மேற்பட்ட பதில்கள் வந்துள்ளனவாம்.

அவர்களில் டாக்டர்கள், பொறியாளர்கள், பத்திரிக்கையாளர்கள், விஞ்ஞானிகள், ஆசிரியர்கள், தொழிலதிபர்களும் அடக்கமாம்.

இருப்பினும் தீவிரப் பரிசீலனைக்குப் பிறகே வரன்கள் இறுதி செய்யப்படும் என்கிறார் கல்கி.

அடுத்த ஆண்டு மார்ச் 8ம் தேதி (மகளிர் தினம்) அல்லது பிப்ரவரி 14ம் தேதி (காதலர் தினம்) ஆகிய ஏதாவது ஒரு நாளில் முதல் கல்யாணம் நடைபெறும் என்று நம்பிக்கை தெரிவிக்கிறார் கல்கி.

இந்தியாவில் அரவாணிகள் அல்லது திருநங்கைகள் குறித்த பார்வை மாறி வருகிறது. அரவாணிகளும் கூட மாறி வருகிறார்கள். பாலியல் தொழில், பிச்சை எடுப்பது உள்ளிட்டவற்றிலிருந்து மீண்டு வருகிறார்கள். இதில் இன்னும் ஒரு படி மேலே போய், சாதாரணப் பெண்களைப் போல திருநங்கைகளும், கணவன், குடும்பம் என்ற கட்டமைப்புக்கு மாறும் சூழல் தற்போது வந்துள்ளதாகவே கருதுகிறேன் என்கிறார் கல்கி.

மேல்சபையில் திருநங்கைகளுக்கு இடம்: "சகோதரி' அமைப்பு வேண்டுகோள்

2011-03-15T07:57:00.000-07:00

செப்டம்பர் 23,2010,23:30 IST

சென்னை : ""தமிழக மேல் சபையில் திருநங்கைகளுக்கும் பிரதிநிதித்துவம் அளிக்கப்பட வேண்டும்,'' என்று திருநங்கைகளின், "சகோதரி' அமைப்பு வேண்டுகோள் விடுத்துள்ளது.
தமிழகத்தைச் சேர்ந்த திருநங்கை கல்கி சுப்ரமணியம் சமூக சேவையில் ஆர்வத்துடன் செயல்பட்டதால், அமெரிக்க அரசின் அழைப்பை ஏற்று 14 நாட்கள் அங்கு சுற்றுப்பயணம் செய்கிறார்.

பயணம் குறித்து சென்னையில் நேற்று நிருபர்கள் சந்திப்பில் கல்கி சுப்ரமணியம் கூறியதாவது:திருநங்கைளின் சமூக, பொருளாதார மேம்பாட்டு சேவைக்காக எட்டு வருடங்களாக பணியாற்றி வருகிறேன். "சகோதரி' என்ற அமைப்பை நிறுவி, இதன் மூலம் திருநங்கைகளுக்கு சட்ட ரீதியாக சமூக பாதுகாப்பை ஏற்படுத்தி கொடுத்து வருகிறேன். மனித உரிமை தொடர்பான சேவையும் செய்து வருகிறேன்.இந்தியாவிலிருந்து ஆண்டுதோறும் சமூக சேவை, சினிமா, அரசியல் போன்றவற்றில் சிறப்பாக சேவை செய்யும் ஒருவரை அமெரிக்க அரசு சுற்றுப் பயணத்துக்கு அழைப்பது வழக்கம்.இந்த வருடம் இந்திய பிரதிநிதியாக அமெரிக்க அரசு என்னை அழைத்துள்ளது. இது எனக்கு கிடைத்த மிகப்பெரிய கவுரவம்.

வரும் அக்டோபர் 1ம் தேதி அமெரிக்கா செல்கிறேன். அங்கு வாஷிங்டன், சாலட் லேக் சிட்டி மற்றும் நியூயார்க்கில் சுற்றுப்பயணம் செய்கிறேன்.அமெரிக்காவில் திருநங்கைகளின் செயல்பாடுகள் எப்படி உள்ளது என்றும் அரசின் செயல்பாடுகளையும், மனித உரிமை செயல்பாடுகள், குழந்தைகள் மேம்பாடு பற்றியும் அறிந்து கொள்ள இப்பயணம் எனக்கு நல்ல வாய்ப்பாக அமைந்துள்ளது. சுற்றுப்பயணம் முடித்து அக்டோபர் 17ம் தேதி சென்னை திரும்புகிறேன்.இங்கு திருநங்கைகள் பாலியல் தொந்தரவாலும், குடும்பத்தினராலும் மிகவும் சங்கடத்திற்கு உள்ளாகின்றனர்; பலர் பிச்சைக்காரர்களாக உள்ளனர். இந்நிலை மாற, திருநங்கைகளின் நலம் காக்க நிறைய உழைப்பேன். தமிழகத்தில் மேல் சபை அமைக்கப்படுகிறது. இதில், திருநங்கைகளுக்கும் பிரதிநிதித்துவம் அளிக்க வேண்டும் என,"சகோதரி' அமைப்பின் சார்பில் கேட்டுக் கொள்கிறேன். இவ்வாறு கல்கி சுப்ரமணியம் கூறினார்.

அரசியலில் பணியாற்றும் முழுத்தகுதியும், திறமையும் எங்களுக்கு உண்டு - திருநங்கை கல்கி

2010-12-04T08:58:00.000-08:00

நேர்முகம் - சகா

அரவாணிகளுக்கு குடும்பத்தில், சமூகத்தில் ஏற்படும் பிரச்சினைகள் என்ன?
முதல் பிரச்சினை மனம், உடல் என்கிறப் போராட்டங்களில் தடுமாற்றம் எங்களுக்குள் பெண்மை வெளிப்படும் பொழுதுக் குடும்பத்தில் பிரச்சினை ஏற்படுகிறது. அக்காவுக்கு கல்யாணம் நடக்காது, தங்கச்சிக்கு கல்யாணம் நடக்காது அதுமாதரி நிறைய விஷயங்கள். அதனால் பெரும்பாலானவர்கள் குடும்பத்தைவிட்டு வெளியேற்றப்படுகிறார்கள். அடுத்ததா கிண்டல்கள், கேலிகளுக்கு ஆளாக்கப்பட்டு பள்ளிகள், கல்லூரிகளில் இருந்துத் துரத்தப்படுகிறார்கள். அதனால் மற்ற திருநங்கைகளுடன் இணைந்து, என்ன பண்றாங்கன்னா ஒன்று, பாலியல் தொழில் அல்லது கைதட்டி பிச்சைக் கேட்பது அது இரண்டும் தான் பண்றாங்க.

இந்த நிலைமை எதனால் ஏற்படுது?
இருந்தே திருநங்கைகளை ஏற்றுக்கொள்ளாமல் இருப்பது. பாலியல் அடையாளம் என்ற காரணமாக ஒதுக்கி வைப்பது. அரவாணிகளாக இருப்பது குற்றமல்ல, அது ஒருதன்மை. அதைப்பற்றிய பாடங்களும் எந்த பாடத்திட்டத்திலும் இல்லை. அதனால் பட்டம் படிச்சவன், ஆராய்ச்சிப் படிப்பு முடிச்சவன்னாலும் இரண்டாவது தான். படிச்சவனானாலும் திருநங்கைகள் விசயத்தில் ஒரே மாதிரிதான் நடந்துக்குறாங்க. அருவருப்பா பாக்குறது - பாலியல் உறவுகளுக்கு பயன்படுத்து கிறது - கழிப்பிடங்களாக உபயோகப்படுத்துறது.

உங்களுக்கு இது மாதிரியான சங்கடங்கள், துன்பங்கள் நிகழ்ந்தது உண்டா?
வந்து என் குடும்பத்தால் ஏற்றுக்கொள்ளப்பட்டு இன்று வரை என் குடும்பத்துடன் தான் வாழ்ந்து கொண்டு இருக்கிறேன். இப்ப சென்னையில் இருந்தாலும் மாசத்துக்கு ஒருதரம் எங்க ஊருக்குப் போய் எங்க அம்மா, அக்கா, தங்கச்சி கூட இருந்துட்டு வருவேன். எனக்கு நண்பர்களும் நிறைய இருக்காங்க. எனக்கு அந்த மாதிரியான தொந்தரவுகள் பெரிசா எதுவும் இல்லை. அந்த பாதிப்புகள், தொந்தரவுகள் அதிகம் நடந்து கொண்டிருந்தது.

இன்றைய தமிழக அரசு அரவாணிகளுக்கு தனியாக நலவாரியம் அமைத்து கொடுத்திருக்கு. அந்த நலவாரியம் அமைவதற்கு உங்களுக்கு பக்க பலமாக இருந்தார்ன்னு யாரைச் சொல்லுவீங்க?
மாநிலங்களவை உறுப்பினர் கனிமொழிதான். அவங்க அரவாணிகள் மேல ரொம்ப அன்பு கொண்டவங்க, அக்கறை கொண்டவங்க. அவங்களோட முயற்சியாலே அரவாணிகள் நலவாரியம் அமைச்சது மட்டுமல்லாமல் பல விசயங்களுக்கு அவர்கள் தொடர்ந்து குரல் கொடுத்துகிட்டே இருந்தாங்க. அரவாணிகள் உணர்வுகள் மதிக்கப்படனும், அவர்களுக்கு முன்னுரிமை கொடுக்கப்படனும் என்று எங்களுக்காக பல மேடைகளில் குரல் கொடுத்தார் கனிமொழி.

பெரும்பாலான திருநங்கைகளுக்கு பாலின மாற்று அறுவைச் சிகிச்சை தொடர்பான விழிப்புணர்வு இருப்பது இல்லை, அதற்கு என்ன காரணம்?
காரணமும் இந்த சமூகம் தான். ஏன்னா முறையான கல்விமுறை இல்லை. சரியான தகவல்கள் ஏதுமில்லை. இந்த சமூகம், திருநங்கைகள் இருக்கிறார்கள் என்பதையே அங்கீகரிக்கவில்லை. இவர்கள் கோமாளிகள், பாலியல் சுகத்திற்கு அலைபவர்கள் அப்படிங்கற பார்வைகள்தான் இருந்துட்டு இருக்கு. என்னைப்போன்று படித்த சிலபேர் தேடல்கள் பெரியளவிற்கு விரிவடையும். இணையத்தின் மூலமா சரியான சிகிச்சை, சரியான மாற்றம் அப்படின்னு நாங்க போயிற்றோம். ஆனால் படிக்காத, ஏழை அரவாணிகளெல்லாம் கொஞ்ச, கொஞ்சமாக காசு சேர்த்து என்ன சிகிச்சை செய்ய முடியும், அப்படின்னுதான் பார்ப்பாங்க.

மருத்துவர்கள் அரவாணிகள் பற்றி குறிப்பிடும்போது தங்களைப் பெண்கள் என்று மனதளவில்தான் நினைத்துக் கொள்கிறார்கள். ஹார்மோன் மூலம் பெண்ணாக மாறுவதற்கு வாய்ப்பில்லைன்னு சொல்றாங்க இது சரியானது தானா?
கூற்றை திருநங்கை மருத்துவர் சொல்லியிருந்தா நான் ஏற்றுக்கொள்வேன். இதுவந்து மனக்குறைபாடுங்கற மாதிரியான கருத்துத்தான் அவர்களது கூற்று. ஆனா அப்படியல்ல. புராண காலத்தோடு இந்து இதிகாசங்கள் எல்லாவற்றிலும் ஆண்கள், பெண்கள், அரவாணிகள் என்ற மூன்று பேரும் இருந்திருக்கிறார்கள். மகாபாரதத்துல அர்ஜூனன் ஒருஆண்டு காலம் அரவாணியாக வாழ்ந்ததா கதையும் உண்டு. சிகண்டிங்கற ஒரு அரவாணி வந்து பீஷ்மரை கொல்ற ஒரு பாத்திரமும் அந்த கதையில் உண்டு. இவர்களுக்கெல்லாம் மனநோயா? ஆக மருத்துவர்கள் வந்து இதுமாதிரி தவறான கருத்து வெச்சிருக்காங்க, இப்படி சொல்ற மருத்துவர்கள் யாரும் எங்களைப் போன்றவர்களுக்கு முறையான சிகிச்சை செய்யும்படி எந்தக்கோரிக்கையும் வச்சதில்லையே. எல்லா மேலைநாடுகளிலும் உள்ள மருத்துவர்களும் இது ஒரு மனநோயல்ல என்று நிரூபித்து விட்டார்கள்.

அரவாணியா இருக்கறதால சமூகத்துல வேறுபட்ட பார்வை இருக்கு. அப்படிப்பட்ட சூழ்நிலையில் வீடு வாடகைக்கு கிடைக்கிற துங்கறது பெரிய சிக்கலா இருக்கும். அதை எப்படி எதிர் கொள்கிறீர்கள்?
பார்த்தீங்கன்னா நெறைய இருக்கு. ஒரு பக்கம் வந்து வேலைக்கு போகும்போதும் முழு பெண்ணாக அறுவை பண்ணிக்கிட்டாலும் நிறையப் பேருக்கு பொருளாதார வசதி இல்லாததால முகமாற்றம், உடல்ரீதியான மாற்றத்திற்கான மருந்துகள் உட்கொண்டு முழுப்பெண்ணாக மாறுவதற்கான வாய்ப்புகள் இல்லாமல் போகும். அதனால் சிலபேர் தோற்றத்தில் ஆண் தன்மையோடு இருப்பாங்க. அவர்களுக்குத்தான் சமூகத்துல பெரிய சவால்கள் இருக்கு. அவர்களுக்கு எங்கேயும் வேலை கொடுக்கமாட்டார்கள். வேலைக்காரியா செக்கறதுக்குக் கூட யாரும் தயங்குவாங்க. சமூகத்துல எல்லா நிலையிலும் அவங்க தள்ளப்படுறாங்க. வீட்டவிட்டு வெளியே வந்தாலே கிண்டல், கேலி. இப்படி துன்பப்படும்போது சமூகத்திற்கெதிராக கைதட்டி பணம் கேட்பது கொடுக்காதபோது புடவையைத் தூக்கி காட்கிறது அல்லது பலாத்காரமாக பணம் பறிக்க முயற்சிக்கிறதுன்னு பன்றாங்க. இதற்குக் காரணம் சமூகம்தான். எந்த ஒரு சிறுபான்மை சமூகத்தையும் அழுத்தி அழுத்தி வெச்சீங்கன்னா ஒரு கட்டத்துல அது போராட்டமா வெடிக்கும். அரவாணிகள் வந்து என்னடா மரியாதை கொடுக்கறது எடுடா காசு என்கிற மாதிரியான நடவடிக்கைல இறங்கி விடுகிறார்கள். ஆனா இந்த மாதிரி நடந்து கொள்ளும் அரவாணிகள் மாறனும். முக்கியமா சமூகத்தோட பார்வையிலும், நடத்தையிலும் மாற்றங்கள் வேணும்.

அரவாணிகள் பற்றி மாணவர்கள், இளைய தலைமுறையினர் புரிந்து கொள்வதற்கு எந்த அணுகுமுறையைக் கையாள்கிறீர்கள்?
தலைமுறையினர், மாணவர்கள் எங்களைப்பற்றி புரிந்து கொள்வதற்காக கல்லூரிகள், பல்கலைக்கழகங்கள் போன்றவற்றில் நான் சென்று உரையாற்றுகின்றேன். இங்கு மட்டுமல்ல, கேரளாவில் உள்ள கல்லூரிகளில் நுழைஞ்சு உரையாற்றுன முதல் அரவாணி நான்தான். கேரளா மாதிரியான ஒரு இடத்தில் அரவாணிகளுக்கு சுத்தமா அங்கீகாரம் கிடையாது. அடி உதை தான் கிடைக்கும். அங்குள்ள அரவாணிகள் ரொம்ப அடிமட்டத்துல இருக்காங்க. ஏன்னா, மதங்கிற ஒரு விஷம் வேரூன்றி இருக்கு. எங்கெல்லாம் மதம்ங்கறது பெரிய விஷயமா இருக்குதோ அங்கெல்லாம் அடக்குமுறை இருக்கும். அது வந்து அரவாணிகளுக்கு ஒரு பெரிய பிரச்சினையா இருக்கு. அதனால, அங்குள்ள கல்லூரிகளுக்கு சென்று உரையாற்றி நல்ல மாற்றத்திற்கான விதையை அங்கு விதைச்சிருக்கேன்.

சமூகத்தில் எந்த மாதிரியான மாற்றங்களை எதிர்பார்க்கிறீர்கள்?
அரசும் செய்யாத ஒன்றை இப்ப இருக்கிற அரசு எங்களுக்கு நலவாரியம் அமைச்சு கொடுத்திருக்குது, அடுத்ததா அரசு கல்லூரிகள்ல ஆண், பெண் மற்றும் மூன்றாம் பாலினமான திருநங்கைகளை சேர்த்திருக்காங்க. இதுவந்து, கோ எஜிகேஷன் கல்லூரிகளில் மட்டும் இந்த அங்கீகாரம் இருக்கும்ன்னு அறிவிச்சிருக்காங்க. மூன்றாவதா திருநங்கைகளுக்கு இலவசமாக வீட்டுமனை பட்டா எல்லாம் குடுக்குறாங்க. வாக்காளர் அட்டை, குடும்ப அட்டை, எல்லாம் கொடுத்திட்டு இருக்காங்க. இன்னும் பாத்தீங்கன்னா அரவாணிகள் எத்தனைபேர் இருக்காங்கன்னு கணக்கெடுத்துட்டு இருக்காங்க. இத அடிப்படையா வெச்சு இன்னும் பல விசயங்களை எங்களுக்காக தமிழக அரசு செய்ய இருக்கு. அடுத்துவர அரசுகளும் அதைத்தொடர்ந்து செய்யும். தமிழ்நாட்டுல அரவாணிகளுக்காக அரசு உதவ தயாராக இருக்கு. எங்களுக்கு குரல் கொடுக்க அரசியல் தலைவர்களும் தயாரா இருங்காங்க. நாங்கள் எதிர்பார்க்கறது எல்லாம் மக்கள் மனமாற்றம் தான். அரசியல் தலைவர்கள் எல்லோரும் வந்து அரவாணிகளுக்கு ஆதரவாகத்தான் இருக்காங்க. மக்கள் மனதில், ஒருவரின் உடல் அமைப்பு, உருவஅமைப்பு, பாலின அமைப்பை வைத்து எடைபோடுவது என்ற தவறான அணுகுமுறை மாற வேண்டும். அரவாணிகளும் மனிதர்கள் தான் என்கிற உணர்வு வரவேண்டும்.

உணர்வுகள் எல்லோருக்கும் ஒன்றுதான் நீங்கள் காதல், திருமணம் போன்ற உறவுகளை எப்படி எதிர் நோக்கியிருக்கிறீர்கள்?
பாதுகாப்பற்றதாக எல்லா திருநங்கைகளுக்கும் இருக்கு. எல்லா உறவுகளையும் தூக்கிப் போட்டுவிட்டு வந்துவிடும் எல்லா அரவாணிகளுக்கும் ஆசை இருக்கும். தனக்கென்று ஒரு துணை வேணும் என்றும், தனக்கென்று காதலன், தனக்கென்று கணவன் இருக்க வேண்டும் என்று ஆசை இருக்கும். ஆனா திருநங்கை வாழ்க்கை சோகம் என்னவென்றால் எந்த ஒரு ஆணும் நிரந்தரமா திருநங்கையோடு இருக்கமாட்டான். நிறையத் திருநங்கைகள் ஆண்களால் ஏமாற்றப்பட்டு, துன்புறுத்தப் பட்டு இருப்பார்கள்.

ஆண்கள் வந்து அரவாணிகளிடம் பழகுவது பணத்திற்காகவும், பாலியலுக்காவும் மட்டுமே. தனக்கு ஆண் துணை வேண்டும் என்பதற்காக அவன் என்ன சொன்னாலும் எப்படி துன்புறுத்தினாலும் பொறுத்துக் கொள்கிறார்கள். ஆண்கள் இதை ஒரு வாய்ப்பாகப் பயன்படுத்திக்கொண்டு எல்லாவற்றையும் பிடுங்கிக் கொள்கிறார்கள். ஆக, காதல் என்பது அரவாணிகள் வாழ்க்கையில் அப்பப்போ வந்துவிட்டுதான் போகும். நிரந்தரமாக இருக்காது. இது எல்லா அரவாணிகளுக்கும் பொருந்தும்.

உறவுகளினால் ஏற்படும் இதுபோன்ற ஏமாற்றங்களை எப்படி தாங்கிக் கொள்கிறீர்கள்?
ஏமாற்றத்தை ஏற்றுக்கொள்வது ஒரு கஷ்டமான விசயம். பெரிய போராட்டமாக இருக்கும். பலர் நொந்து தற் கொலைப் பண்ணிக்கொள்வார்கள். சிலர் எதிரா திரும்பிவிடுவார்கள். ஏமாற்றிய ஆணை பழிவாங்க எந்தளவுக்கு முடியுமோ அந்தளவுக்கு அவமானப்படுத்தி விடுவார்கள். இன்னும் பலர் மனதுக்குள் குமுறிக் கொண்டு போதைப் பழக்கத்துக்கு, அதாவது குடி, பாக்கு போன்றவற்றை பயன்படுத்தித் துன்பத்தை மறக்க அந்தப் பழக்கத்துக்கு அடிமையாகி விடுகிறார்கள்.

ஜாதிக்கொடுமை, பெண்ணடிமை மூன்றாவதாக அரவாணிகள் ஒடுக்குமுறை இந்த மூன்றையும் செய்யும் ஆண் சமூகத்தின் மீது உங்கள் மனநிலை என்ன?
ஆணாதிக்கம் அப்டிங்கற விசயம் பெண் சமூகத்தையே அடக்கி வெச்சி ருக்குது. பெண்களை அடக்கும்போது அரவாணிகளை அடக்கு வது என்பது அதன் தொடர்ச்சி தான். இதற்கு மதங்கள் மிகப்பெரிய காரணம் தான். ஜாதிகள் பிரிப்பு, பாலின ஒடுக்குமுறை இதெல்லாம் அதற்குள் அடங்கிவிடுகிறது. ஆனா, அரவாணிகள் எல்லாம் இதற்குள் சிக்கவில்லை. நாங்கள் அரவாணிகளாக மாறிய உடனே எங்க ஜாதியெல்லாம் தூக்கிப்போட்டுவிடுகிறோம். அரவாணிகளாகிய நாங்களெல்லாம் ஒரே குடும்பமாக இருக்கிறோம். என்னுடைய குரு பிறப்பில் முஸ்லிம், நான் இந்து இருந்தாலும் அவர்தான் என்னுடைய தாய். ஆக ஜாதி மதமெல்லாம் எங்களுக்கு கிடையாது. மற்றபடி பெண்ணுக்கு ஏற்படுகிற அனைத்த அடக்குமுறைகளும் எங்களுக்கும் உண்டு. நீ பெண் மாதிரி இருக்கிறியா அதனால உன்னை அடக்குறேன் என்று ஆண் சமூகம் கேவலமாக நடந்து கொள்கிறது.

அரவாணிகளில் குறிப்பிட்ட விழுக்காட்டினர் பாலியல் தொழிலில் ஈடுபடுகிறார்கள். இப்ப கேள்வி என்னன்னா உயிர் கொல்லி நோய் அதாவது எச்ஐ.வி, எய்ட்ஸ் இவர்களால்தான் பரப்பப்படுவதாக சமூகத்தில் கட்டமைப்பு நடந்து கொண்டு இருக்கே?
தன்னுடைய உடம்பில் எச்ஐவி கிருமிகளை உற்பத்தி செய்யும் நிறுவனம் ஒன்றும் நடத்தல. ஒரு அரவாணிக்கு எய்ட்ஸ் வருதுன்னா அவங்ககிட்ட உறவு வைத்துக் கொள்கிற ஒரு ஆண் மூலமாகத்தான் வருது. அரவாணிகள் பாலியல் தொழில் செய்வது உடல் சுகத்திற்காக அல்ல, வயிற்றுப் பசிக்காக. எல்லா ஆண்கள் கிட்டேயும் காண்டம் போட்டுட்டு உறவு வெச்சுக்கங்கன்னு சொல்ல முடியாது. பல ஆண்கள் ரொம்ப முரட்டுத்தனமா இருப்பாங்க. அப்படி இருக்கறப்போ இந்தமாதிரி நோய் பரவுவதற்கு ஆண்கள்தான் காரணம்.

அரவாணிகள் அரசியலில் பங்கெடுப்பது குறித்து நீங்கள் எப்படி பார்க்கிறீர்கள்?
என்னைப் பொறுத்தவரை திருநங்கைகள்தான் அரசியலுக்கு, பொறுப்புகளுக்கு மிக மிக தகுதியானவர்கள் என்று சொல்வேன். அதற்கு காரணம் சமூகத்தில் அதிக அளவு பாதிக்கப்பட்டது அரவாணிகள்தான், ஆணா இருந்து பெண்ணா மாறியதால் ஆணுக்கு என்ன பிரச்சினை பெண்ணுக்கு என்ன பிரச்சினை என்று தெரியும். அடுத்த காரணம் சொத்து சேர்த்து வைக்கலாம் என்கிற தேவை யெல்லாம் திருநங்கைகளுக்கு இல்லை. நாங்க அடிப்பட்டு வந்ததால் தைரியம் இருக்கு. அரசியலுக்கு தேவையான துணிச்சல், நேர்மை எங்களிடம் நிறையவே இருக்கு. அடுத்து வர தேர்தல்களில் நிறைய அரவாணிகள் போட்டியிடுவோம். அந்த சூழ்நிலை உருவாகி வருகிறது.

உங்களுக்காக மட்டுமேப் போராடிக்கொண்டு இருந்த நீங்கள் அதிரடி யாக ஈழத்தமிழர்களுக்காக உண்ணாநிலை ஒப்பாரி போராட்டம் நடத்தினீர்கள். அதற்கு என்ன காரணம்?
எங்களுடையப் பிரச்சினைகள் ஒரு புறம் இருந்தாலும், சமூகத்துல என்ன நடக்குதுன்னு பார்த்துகிட்டேதான் இருக்கிறோம். ஈழத்தமிழர் பிரச்சினையில் கடந்த இருபது ஆண்டுகளாக எத்தனை தமிழர்கள் கொல்லப்பட்டார்கள், எத்தனை பெண்கள் வன்கொடுமைக்கு ஆளானார்கள் என்பதை எல்லா ஊடகங்கள் வாயிலாகவும் தெரிந்து கொண்டு வந்திருக்கிறோம். போர் தீவிரமடைந்து பல பேர் மரணமடைந்தார்கள். அது எங்க எல்லாரையும் வேதனைப் படுத்துச்சு. தங்கள் குடும்பத்தை இழந்து, தன் சகோதரிகள், தாய் போன்றோரை இழந்து தன்னந்தனியாக தன்நாட்டை விட்டு எலிகளாக வரும் கொடுமை எங்களுக்கானதாக இருக்கிறது. ஏன்னா, நாங்க அரவாணிகள் என்றக் காரணத்திற் காகவே குடும்பத்தைவிட்டு வெளியே வந்து விடுகிறோம். அல்லது துரத்தப்படு கிறோம். ஆக சொந்த நாட்டிலேயே புலம் பெயர்ந்து வாழும் வேதனை எங்களுக்கு இருக்கிறது. அதுபோலவே ஈழத்தமிழர்கள் பிரச்சினைகளையும் எங்களால் புரிந்து கொள்ள முடிந்தது. ஆகவே தான் அந்தப் போராட்டத்தை நடத்தினோம். ஈழத் தமிழர்களுக்கான எங்கள் ஆதரவைத் தெரிவிக்கவே நாங்கள் போராட்டத்தை நடத்தினோம். சகமனிதர்கள், தமிழர்கள் என்பதற்காக முதன்முறையாகக் குரல் கொடுத்ததற்கு நாங்கள் பெருமைப்படுகிறோம். அதுபோல ஒடுக்கப்படும் அனைத்து மக்களுக்காகக் குரல் கொடுத்துக் கொண்டு இருந்தால்தான் சமூகத்தால் நாங்களும் அங்கீகரிக்கப்படுவோம்.

அரவாணிகள் என்பவர்கள் ஓரினச்சேர்க்கையில் ஈடுபடுபவர்கள் தான் என்று கருத்து நிலவுகிறதே, அது உண்மையா?
முழுக்க முழுக்க தவறான கருத்து. சில கருத்துக்கள் வதந்திகளாய் பரவுகிறது. ஓரினச்சேர்க்கையாளர்களுக்கும், அரவாணிகளுக்கும் நிறைய வேறுபாடு இருக்கு. ஓரினச் சேர்க்கையாளர்கள் அதாவது ஹோமோ செக்ஸ் வைத்து கொள்பவர்களுக்கு உடல் ரீதியான தொந்தரவுகள் எதுவும் இருப்பதில்லை. தங்களை ஆண்களாகத்தான் அடையாளப்படுத்திக் கொள்கிறார்கள். ஆனா அரவாணிகளுக்கு தான் யார்? என்பதே முதல் பிரச்சினை. இரண்டாவதா தான் யாரால் ஈர்க்கப்படுகிறோம் என்கிறப் பாலியல் பிரச்சினை.

ஆக அரவாணியை பொறுத்தவரை பாலியல் உணர்வு என்பது இரண்டாம் பட்சம்தான். முதலாவது தான் ஆணா, பெண்ணா என்பதுதான். ஒரு அரவாணி யைப் பொறுத்தவரை துணையில்லாமல் பாலியல் ஈர்ப்பில்லாமல் இருந்து விடுவார். ஒரு ஆண் துணையில்லாமல் அவளால் இருக்கமுடியும். ஆனால் ஒரு ஆணுக்கும், பெண்ணுக்கும் காதல் என்று வருவதைத் தவறென்று நாம் கருத முடியாது. ஏன்னா அது அவங்களுடைய தனிப்பட்ட விசயம். மற்றவர் படுக்கை அறையை நாம் எட்டிப்பார்க்கக் கூடாது

திருநங்கைகள் திருமணம்பற்றி சன் தொலைக்காட்சியில் என் நேரலைப்பேட்டி..

2010-04-03T18:29:00.000-07:00

திருநங்கைகள் திருமணம்பற்றி சன் தொலைக்காட்சியில் திரு.மலையப்பனின் கேள்விகளுக்கு எனது பதில்கள். பாலியல் மருத்துவர் காமராஜும் என்னோடு விவாதிக்கிறார்.

நான் கல்கி ஆனது எப்படி?

2010-03-22T00:37:00.001-07:00

தன்னை உணர்ந்து நிரூபித்து, இந்தச் சமூகத்தின் பார்வையைத் திருத்தியவரின் கதை...

''நாங்கள் தேவதைகள் இல்லை. பிசாசுகளும் இல்லை. உங்கள் எல்லோரையும்போல இதயமும் இரைப்பையும் உள்ள மனிதர்கள். பசி, தூக்கம், கனவு, காதல், காமம், திறமை, தேடல், உழைப்பு, கருணை, காயம், கோபம், துக்கம், பெருமிதம் எல்லாம் எங்களுக்கும் உண்டு. நாங்களும் ஓர் அம்மாவின் வயிற்றில் இருந்துதான் பிறந்தோம், உங்களைப்போலவே!'' - செறிவான சொற்களில், திருத்தமான தமிழில் பேசுகிறார் கல்கி.

இந்தியத் திருநங்கைகளின் வாழ்க்கை மிகத் துயரமானது. அவமானங்களையும், ஏளனங்களையும், புறக்கணிப்புகளையுமே எதிர்கொள்ளும் திருநங்கைகள் சமூகத்தில் இருந்து மாற்றத்தை நோக்கிச் செயல்படும் ஒருவர்... கல்கி.

''நான் இதழியல் மற்றும் மக்கள் தொடர்பியலில் முதுகலைப் பட்டம் பெற்றிருக்கிறேன். சர்வதேச உறவுகள் படிப்பில் இன்னொரு முதுகலைப் பட்டம் வாங்கியிருக்கிறேன். மேற்கொண்டும் படிப்பேன். இவை அனைத்தும் இவ்வுலகில் ஒடுக்கப்பட்டவர்களாக வாழ நிர்ப்பந்திக்கப்படும் திருநங்கைகள் மற்றும் ஒருபால் ஈர்ப்புக்கொண்டவர்களின் உரிமைகளுக்காகப் போராடுவதற்காகவே.

மேற்குத் தொடர்ச்சி மலையின் தென்றல் வீசும் அழகான பொள்ளாச்சி,நான் பிறந்த ஊர். வசதியான குடும்பத்தில் பிறந்ததால் கான்வென்ட் படிப்பு. அப்பா, தி.மு.க-வில் தீவிரமாக இருந்ததால் தமிழ் மீதான பற்று அதிகம். கலைஞர் எங்கள் ஊருக்குப் பேச வரும்போது அப்பா என்னையும் மேடையில் ஏற்றிவிடுவார். ஏழு வயதிலேயே தி.மு.க-வின் பிரசார ஜீப்களில் அப்பாவோடு சுற்றியிருக்கிறேன். போராட்டங்களில் பங்கேற்று இருக்கிறேன். அறிந்தோ, அறியாமலோ போராட்டம் என்பது சிறு வயதில் இருந்தே பழகி விட்டது.

எட்டாம் வகுப்பு படிக்கும்போதே கையெழுத்துப் பத்திரிகை நடத்தினேன். தமிழிலும் ஆங்கிலத்திலும் முதல் மார்க் நானே. இதெல்லாம் படிப்பு சார்ந் தவை. இதனால் எல்லாம் என் உடல் மாற்றங்களை மறைக்க முடியவில்லை. நானே குழம்பி நின்ற வேளையில்தான் சக மாணவர்களால் கேலியும் கிண்டலும் செய்யப்பட்டேன். பள்ளியில் கிண்டலாக இருந்தது, கல்லூரியில் சீண்டலாக மாறியது. துன்பங்களையும் துயரங்களையுமே நண்பர்கள் பரிசளிக்க, நான் புத்தகங்களின் மடிக்குள் பதுங்கிக்கொண்டேன். பெரியார், அண்ணா, லெனின், பகுத்தறிவு, ஒடுக்கப் பட்டவர்களின் வாழ்க்கை என மேலும் மேலும் படித்தேன். புத்தகங்கள் மட்டுமே அனைத்துக்குமான வடிகாலாக இருந்தன.

என் தாய் - தந்தை சாதி மறுப்புத் திருமணம் செய்துகொண்டவர்கள். என் தாய் நிறையத் துன்பங்களைச் சந்தித்தார். சகிப்புத்தன்மையுடன் வாழ்ந்தாலும் துன்பங்களை எதிர்த்துப்போராட அவர் தயங்கியது இல்லை. என் அம்மாதான் எனக்கு ரோல் மாடல். நான் ஒரு திருநங்கை எனத் தெரிந்தும் ஆதரவோடு அரவணைத்துக்கொண்டவர் அம்மா. ஆனால், என்னைச் சுற்றிய மற்ற திருநங்கைகளின் வாழ்வு அவலத்திலும் அவலமாக இருப்பதைக் கண்டேன். வெளிச்சத்தில் கேலி கிண்டல், இருட்டில் பாலியல் கொடுமைகள். இவற்றை எதிர்த்துப் போராட இயலாத அளவுக்கு வறுமையும், கல்வியறிவு இல்லாமையும் அவர்களை வாட்டியது. 'பொருளாதாரப் பிரச்னைகள் இல்லாத, குடும்பத்தின் ஆதரவுக்குள் வாழும் நாம் இதற்கு ஏதாவது செய்ய வேண்டும்' என நினைத்து முழுக்க முழுக்க திருநங்கைகளுக்காகவே 'சகோதரி' என்ற இதழைத் தொடங்கினேன்.

படித்துக்கொண்டே ஒரு ஐ.டி. நிறுவனத்தில் வேலைசெய்து எனது சுய சம்பாத்தியத்தில் முதல் பால்மாற்று அறுவைசிகிச்சை செய்துகொண்டேன். ஓயாத தேடல் என்னை ஆரோவில் சர்வதேச நகரத்துக்கு இடம் பெயரவைத்தது. அபூர்வ இசைக் கருவிகள் தயாரிக்கும் கிராமத்து இளைஞர்கள் எட்டுப் பேருடன் சேர்ந்து காடுகள், மலைகள் என இசை ஆராய்ச்சிக்காக எங்கெல்லாமோ சுற்றினேன். என்னை ஓர் இனிய தோழியாக நடத்திய அவர்களின் இசை அறிவை உலகம் அறிந்துகொள்ள, ஓர் இணையதளம் தொடங்கினேன். இன்று அவர்கள் வெற்றியாளர்கள். அதில் எனக்கும் ஒரு பங்கு இருக்கிறது என்பது மனநிறைவைத் தருகிறது. திருநங்கைகளின் வாழ்வுரிமைபற்றிப் பேசப் பல மாநிலங்களுக்குச் சுற்றியிருக்கிறேன். ஆயிரக்கணக்கான கல்லூரி, பல்கலைக்கழக மாணவர்களைச் சந்தித்திருக்கிறேன். திருநங்கைகள் மட்டுமின்றி, மாற்றுப்பாலின அடையாளம்கொண்டவர்கள், தன்பால் விழைவுகொண்டவர்களின் உரிமைக்காகவும் பேசுகிறேன். இதுகுறித்து ஊடகங்களுக்கான கருத்தரங்குகள், ஆவணப் படங்கள் எனத் தொடரும் பயணத்தில் என் சக திருநங்கைகள் பலர் என்னுடன் கைகோத்துள்ளனர்.

திருநங்கைகள் பாலியல் தொழில் செய்யவும், பிச்சை எடுக்கவும் பிரதான காரணம் வறுமைதான். பெற்றோர்கள் கைவிடுகிறார்கள், ஊர் கிண்டல் செய்கிறது, சமூகம் வேலை தருவது இல்லை. பிறகு, அவர்கள் வாழ்வதற்கு என்ன வழி? பொருளாதார முன்னேற்றம்தான் மாற்றத்தின் முதல்படி. அதனால்தான் 'பட்டாம் பூச்சிகள் திட்டம்' என்ற பெயரில் அழகு ஆபரண நகைகள் தயாரிக்கும் சுயதொழில் திட்டத்தைத் திருநங்கைகளுக்குப் பயிற்றுவித்தோம். தமிழக அரசு 1.5 லட்ச ரூபாய் மானியம் வழங்கியது. திருநங்கைகள் அபரிமிதமான கலை ஆற்றல் மிக்கவர்கள். அதை உலகறியச் செய்வதற்காக 'விடுதலை கலைக் குழு' என்ற குழுவைத் தொடங்கிஇருக்கிறேன். ஆர்வமும் உழைப்பும்மிக்க 25 திருநங்கைகளுக்கு தமிழ்நாட்டு நடனம், ஆப்பிரிக்க, தென் அமெரிக்கப் பழங்குடி மக்களின் இசையையும் கற்பிக்கிறோம். வெகு விரைவில் தனித்துவம் மிக்க இசைக் கலைஞர்களாக அவர்கள் பரிணமிப் பார்கள்.

எல்லாவற்றையும்விட முக்கியமானது www.thirunangai.net என நான் தொடங்கிய இணையதளம். பாலியல் சுரண்டலுக்கு மட்டுமே பயன்படுத்தப்படும் திருநங்கைகளை வாழ்க்கைத் துணையாகத் தேர்ந்தெடுக்க விரும்பும் ஆண்களைக் கண்டறிவதே இதன் நோக்கம். திருநங்கைகளுக்கான உலகின் முதல் மேட்ரிமோனியல் வெப்சைட்டும்கூட. ஆறு திருநங்கைகளின் வரன்களுடன் ஆரம்பிக்கப்பட்ட இந்த வெப்சைட்டைப் பார்த்து, இப்போது உலகம் முழுவதும் இருந்து 600-க்கும் அதிகமான ஆண்கள் விண்ணப்பித்து இருக்கிறார்கள். 'உலகம் மாறிக்கொண்டு இருக்கிறது' என்ற நம்பிக்கையுடன் தொடர்ந்து செயல்பட்டு வருகிறோம்.

விரைவில், இந்தியா முழுவதும் மக்கள் தொகைக் கணக்கெடுப்பு நடக்கப்போகிறது. இதில் திருநங்கைகளின் எண்ணிக்கை தனியாகக் கணக்கெடுக்கப்பட வேண்டும். அதன் அடிப்படையில் இடப்பங்கீடு, தேர்தலில் போட்டியிடும் உரிமை, சொத்துரிமை, திருமணம் மற்றும் குழந்தை தத்தெடுப்பு உரிமை போன்றவை வழங்கப்பட வேண்டும். என் நோக்கமும் செயல்பாடும் இப்போது இதை நோக்கித்தான் இருக்கிறது!''

மூலம் : ஆனந்த விகடன்

திருநங்கைகள் தெருவுக்கு வருவது பெற்றோரால்தான் ...

2010-02-14T09:34:00.000-08:00

அள்ளி அணைக்காவிட்டாலும் ....அடித்துத் துரத்தாதீர்கள் !

வீட்டிலிருந்து அடித்துப் பிடித்து ஓடி வந்து பஸ் ஏறுவோம். அதிர்ஷ்டவசமாக ஒரே ஒரு ஸீட் மட்டும் காலியாக இருக்கும். ஒடிப்போய் உட்கார நினைக்கையில், அதில் ஒரு 'திருநங்கை' உட்கார்ந்திருந்தால்... 'உட்காருவதா, வேண்டாமா' என்று மனதுக்குள் பட்டிமன்றம் நடத்திவிட்டு, நம்மில் பெரும்பாலானோர் அவருடன் சேர்ந்து உட்கார மனம் (?) இன்றி, கால் வலித்தாலும் நின்று கொண்டே பயணம் செய்வோம்.

என்ன குற்றம் செய்தாலும் 'எம்புள்ள' என்று நம்மைக் கொண்டாடும் தாய் போல, அந்த திருநங்கைக்கும் ஒரு தாய் இருக்கிறார்தான். ஆனால், அந்தத் தாயும் வீட்டை விட்டுத் துரத்தி விடுவதால்தான், தங்கள் வயிற்றுப் பிழைப்புக்காக பலர் பிச்சை எடுக்கிறார்கள்; சிலர் பாலியல் தொழிலில் தள்ளப்படுகிறார்கள்; ஒட்டுமொத்தமாக சமூகத்தின் விளிம்பிலேயேநிற்கவைக்கப்படுகிறார்கள். மைய நீரோட்டத்துக்குள் அவர்களை அனுமதிப்பதேயில்லை.

அது ஏன்?

'பெற்றோர் அவர்களை ஏற்றுக்கொண்டால்... இவர்களின் இருப்பும், வாழ்வும் ஒரு சமூகப் பிரச்னையாக உருவாகாது!' என்கிறது, அவர்களைப் பற்றி பேசுவதற்காக 'அவள் விகடன்' ஏற்பாடு செய்த இந்த கலந்துரையாடல்! பிரச்னையின் வலி, தீர்வுக்கான வழி என்று ஆலோசிக்கும் இந்தக் கலந்துரையாடலுக்கு, 'திருநங்கை' கல்கி, 'குடும்பநல ஆலோசகர்' மாக்தலின் ஜெயரத்னம், பெற்றோர் பிரதிநிதியாக மீனா, பதின்பருவத்தினரின் பிரதிநிதிகளாக தாமரைச்செல்வி, ஷபனா ஆகியோரின் வார்த்தைகள் வலு சேர்த்தன.

பரஸ்பர அறிமுகங்களுக்குப் பின் பரிமாறப்பட்டன வார்த்தைகள்!

கல்கி: இப்படி டீன்-ஏஜ் பெண்கள், ஒரு அம்மா, ஆலோசனை சொல்ல ஒரு ஆலோசகர்னு எல்லாரும் திருநங்கைகள் நிலமை பத்தி பேச வந்திருக்கறதே என் மனசுக்கு ரொம்ப சந்தோஷமா இருக்கு. எங்களை எப்பவுமே இழிபிறவிகளா நினைக்கற, நடத்தற இந்தச் சமூகம் ஒரு விஷயத்தை நினைச்சுப் பார்க்கணும். இப்படி பிறந்தது எங்களோட தவறா...?

தாமரைச்செல்வி: சமூகம் இதைப் புரிதல் இல்லாம பார்க்கறது வருத்தமானதுதான்! பட், எனக்குத் தெரிஞ்சு எங்க டீன் ஃப்ரெண்ட்ஸ் சர்க்கிள்ல யாரும் திருநங்கைகள் பத்தி இழிவாப் பேசறது கிடையாது. ஆனா, நீங்க 'எப்படி' இருப்பீங்கங்கறதைப் பத்தி எங்களுக்கு நிறைய கன்ஃப்யூஷன்ஸ்...

கல்கி: புரியுது. நிறைய பெரியவங்களுக்கும் இந்தக் குழப்பம் இருக்கு. திருநங்கைகள்ல இரண்டு வகை இருக்கோம். ஆணாப் பிறந்து, மனதளவில் பெண்ணா வாழ்ந்து, குறிப்பிட்ட கட்டத்தில் பெண்ணாவே மாறுறவங்க ஒரு வகை. இவங்க தங்களோட பாலின அடையாளமான ஆண் உறுப்பை ஆபரேஷன் மூலமா நீக்கிட்டு... மனதாலும், உடலாலும் பெண்ணாவே வாழ்வாங்க. பிறப்பால் பெண்ணாப் பிறந்து, மனதளவுல தங்களை ஆணா உணர்றவங்க, இன்னொரு வகை. சில கேஸ்கள்ல இரு பாலின உறுப்புகளோட சேர்ந்து பிறக்கறவங்களும் உண்டு.

மீனா: கல்கி, எந்த வயசுல இப்படி மாற்றம் உண்டாகும்..?

கல்கி: எல்லா பெற்றோர்களும் தெரிஞ்சு வச்சுக்க வேண்டிய விஷயம் இது. டீன்-ஏஜுலதான் முழுமையா தெரியும்னாலும்... எட்டு வயசுலயிருந்தே இந்த மாற்றம் ஆரம்பிக்கும். அப்போ பேசுறது, நடக்குறதுனு எல்லா செய்கைகளும், 'பாடி லாங்குவேஜு'ம் பெண் பிள்ளைகளுக்கு ஆண்கள் போலவும், ஆண் பிள்ளைகளுக்கு பெண்கள் போலவும் மாறும்.

மீனா: இது மனசுக்குள்ள நடக்கற மாற்றம்தானே... அத நாம மனசு வச்சா மாத்த முடியாதா...?

மாக்தலின்: இதுதான் எல்லா பெற்றோரின் எண்ணமும், கோபமும். 'ஏன் இப்படி நடந்துக்கற...? ஒழுங்கா லட்சணமா ஆம்பளப் புள்ள மாதிரி இரு'னு ஆரம்பிக்கற அவங்களோட கோபம், அப்புறம் அடி, சூடுனு மொழி மாறும். ஆனா, அந்த குழந்தையால அப்படி ஈஸியா மாத்திக்க முடியாது. ஏன்னா, இங்க ஒரு பெண்ணோட 'மனசு' ஆணோட 'உருவ'த்துக்குள்ள சிறைபட்டுக்கிடக்கு. ஆண் உருவத்துக்குள்ள இருக்கேங்கற காரணத்துக்காக, ஆணா நடந்துக்க முடியாது. அதை பெற்றோர்கள் புரிஞ்சுக்கணும்.

கல்கி: கூடவே, திருநங்கையா மாறிகிட்டுயிருக்கப்ப, 'நாம் ஆண் பிள்ளைதானே... அப்பறம் ஏன் பொண்ணு மாதிரியே நடந்துக்கத் தோணுது..?'னு அந்த குழந்தைக்கேவும் பயங்கரமான குழப்பம் இருக்கும். 13-14 வயசான டீன்- ஏஜ்ல இந்த உடல், மனமாற்றம் சீரியஸாகி, அவங்களை ஆட்டிப்படைக்கும்.

மாக்தலின்: இப்படி உடல் மாற்றம் ஒரு பக்கம் கஷ்டப்படுத்தும்னா, அப்பத்தான் பெற்றோர்களோட டார்ச்சரும் அதிகமா இருக்கும். 'எனக்குப் போயி ஏன் இப்படி ஒரு புள்ள பொறந்துச்சு'னு ரொம்பத் துன்புறுத்த ஆரம்பிப்பாங்க. அம்மா, அப்பா பண்ற டார்ச்சர் தாங்க முடியாம, ஏழாவது எட்டாவது படிக்கற அந்தக் குழந்தை வீட்டை விட்டு ஓடிடும்.

ஷபனா: அம்மா, அப்பாவுக்கும் இது கஷ்டமான சூழ்நிலைதானே? வீட்ல ரெண்டு குழந்தைங்க இருக்காங்க. ஒருத்தருக்கு 'இப்படி' பிரச்னைனா இன்னொருத்தருக்கு எப்படி கல்யாணம் நடக்கும்...?
மீனா: இதுதான் ஒவ்வொரு குடும்பத்துலயும் வர்ற தர்மசங்கடமான சூழ்நிலை. இன்னொரு பெண்ணைப் பார்க்க வர்ற மாப்பிள்ளை, 'ஐயோ.. நாளைக்கு இந்தப் பொண்ணும் இப்படி மாறிட்டா என்ன பண்றது'னு தயங்கி, அந்த பெண்ணோட கல்யாணமும் பாதிக்கப்படுது.
கல்கி: ஆனா, இது ஒரு நோய் கிடையாது. உடல் ஊனம்னுகூட சொல்ல முடியாது. பரம்பரையா பரவக்கூடிய வியாதியும் கிடையாது. அதனால அக்காவுக்கு பிரச்னை இருந்தா, தங்கச்சிக்கும் பிரச்னை வருங்கறதுக்கு... நோ சான்ஸ்! புரிஞ்சுக்கோங்க!

மாக்தலின்: பெற்றோர்கள் மட்டுமில்ல... அந்த குழந்தைகளோட டீச்சர்களும் இதப் புரிஞ்சுக்கணும். எங்கிட்ட வர்ற நிறைய கேஸ்கள்ல, டீச்சர்கள் 'இப்படி' நடக்காதேனு அந்தக் குழந்தைகள ரொம்பக் கடுமையா தண்டிச்சிருக்காங்க, மோசமான வார்த்தைகளால திட்டியிருக்காங்க.

ஷபனா: டீச்சர்ஸ§க்கு மட்டுமில்ல... அவங்க கூட இருக்குற ஃப்ரெண்ட்ஸ§ம் அவங்களுக்கு சப்போர்ட்டிவா இருக்கணும். என் காலேஜ்ல எங்களுக்கு இப்படி ஒரு திருநங்கை ஃப்ரெண்டா கிடைச்சப்போ... நாங்க அவளை வித்தியாசமா நடத்தினதில்ல. ஆனா, இது எல்லா இடங்களிலும் நடக்கிறதில்லைங்கறதுதான் பிரச்னை.
தாமரைச்செல்வி: அக்கா, என் கேள்வி உங்களை கஷ்டப்படுத்தினா... ஐ'ம் ஸாரி. ஆனா திருநங்கைகனாலே பிச்சை எடுக்கணுமா...? கெட்ட வார்த்தைகள்ல திட்டணுமா...? பாலியல் தொழில்தான் செய்யணுமா...?
கல்கி: இதுதான் இந்தச் சமூகம் எங்க மேல வச்சிருக்க அபிப்ராயம். ஆனா, நாங்க ஏன் பிச்சை எடுக்கிறோம்? எங்களுக்கு படிப்பறிவு இல்லை. எங்களுக்கு படிப்பு வராம இல்லை. நாங்க ஸ்கூல்ல படிக்கிற நேரத்துலதான், இந்த மாற்றம் நடக்குது. அப்பா, அம்மாவே அவமானத்துக்குப் பயந்து எங்களை வீட்டை விட்டுத் துரத்திடறாங்க. அந்த பதினாலு, பதினஞ்சு வயசுல... எங்களுக்கு வேலை தரவும் யாரும் முன் வர்றதில்லை. நாங்க என்ன செய்வோம்? எங்களுக்கும் பசிக்கும்தானே? பிச்சையெடுக்கறோம். சிலர் பாலியல் தொழிலுக்குப் போறாங்க.
நாங்க கெட்ட வார்த்தைகள்ல திட்டுறோம்னு சொல்றீங்க. மறுக்கல. ஆனா, எங்கள கடந்து போறவங்கள்ல இருந்து சினிமா வரைக்கும் என்ன மாதிரி வார்த்தைகள்ல எல்லாம் இந்த சமூகம் எங்களை கொல்லுது?! (கனத்த மௌனம். பிறகு தொடர்கிறார்) நாங்கதான் மிகக் கொடுமையான அளவுக்கு பாலியல் பலாத்காரத்துக்கு ஆளாகறோம்... போலீஸ் ஸ்டேஷன்லகூட! எங்களுக்கு சட்ட ரீதியான பாதுகாப்பும் இல்லை. இப்படியெல்லாம் எங்களை இந்தச் சமூகம் டார்ச்சர் பண்ற அளவுக்கு, அப்படி நாங்க என்ன குற்றம் செஞ்சோம்?
மாக்தலின்: திருநங்கைகளோட பிரச்னைகள் வெளிய தெரிஞ்சதே, இந்தியால எய்ட்ஸ் நோய் பெரிய அளவுக்கு வந்த பின்னாடிதான். வரும் காலத்துல மிகப் பெரிய சமூகப் பிரச்னையா இது உருவாகாம தடுக்கறது பெற்றோர்களோட கையிலதான் இருக்கு. ஒரு வீட்ல குழந்தை ஊனமா, மனவளர்ச்சி குன்றி பிறந்தா அந்த குழந்தையை எப்பாடுபட்டாவது காப்பாத்தறோம். அதேமாதிரி திருநங்கையா ஒரு குழந்தை உருவாக நேருச்சுனாலும், 'இது நாங்க பெத்த குழந்தை. யார், என்ன சொன்னாலும் இதை நாங்க கஷ்டப்பட்டு வளர்த்துதான் ஆவோம்!'னு பெற்றோர்கள் உறுதியா நினைச்சா, வைராக்கியமா இருந்தா... அது வீட்டை விட்டு வெளியேற வேண்டிய அவசியம் இருக்காது. அதே வீட்ல அது மற்ற குழந்தைகளைப்போல திறமையான குழந்தையா வளரும். அது பெற்றோர் மனசு வச்சாத்தான் நடக்கும். அந்த உறுதி பெத்தவங்களுக்குத்தான் வரணும்.
கல்கி: இது பெத்த உங்க குற்றமும் இல்லை. பிறந்த எங்க குற்றமும் இல்லை. இயற்கையோட குற்றம். அதுமட்டுமில்ல... இயற்கையில இதுவும் ஒரு படைப்புனே சொல்லலாம். ஆண், பெண்... இது ரெண்டுதான் மனிதப் படைப்புகள்னு யாரு முடிவெடுத்தது? மூணாவதாவும் ஒரு பாலினம் புராண, இதிகாச காலத்துல இருந்தே இருக்குதே! அர்த்தநாரீஸ்வரர்ங்கற பேருல ஈஸ்வரனை வழிபடற நீங்க... அதோட உருவமா வலம் வர்ற எங்கள இகழ்ந்து தள்ளறீங்க. மகாபாரதத்துல அர்ஜுனன் ஒரு வருஷ காலத்துக்கு திருநங்கையா வருவார். அதேபோல, சிகண்டிங்கற ஒரு கேரக்டரும் அதுல உண்டு. மகாபாரத சீரியல் போட்டா விழுந்து விழுந்து பாக்கறீங்க. அர்ஜுனா விருது கூட உண்டாக்கியிருக்கீங்க. ஆனா, நிஜத்துல எங்களை குறைந்தபட்சம் உயிருள்ள ஒரு ஜீவனாகூட ஏத்துக்கல. வீடுகள்ல நாயைக் கூட வளர்க்கறீங்க... ஆனா, கூடவே பொறந்த எங்களை துரத்தி அடிக்கறீங்க.
மாக்தலின்: இதெல்லாத்துக்கும் காரணம்... பரஸ்பர அன்பு பாராட்டல் என்கிறதை விட்டுட்டு, எல்லாத்தையுமே சமூகம், அந்தஸ்து, கௌரவம்கிற தராசுல வெச்சு மனித சமுதாயம் நிறுத்த பார்க்க ஆரம்பிச்சதுதான்.
கல்கி: சரியா சொன்னீங்க. ஒரு 200 வருஷத்துக்கு முன்ன வரைக்கும் எங்களுக்கு எந்தப் பிரச்னையும் இல்ல. மூணாவது பாலினமா... கௌரவத்தோடதான் வலம் வந்திருக்கோம். அதுக்குப் பிறகுதான், நாகரிக வளர்ச்சிங்கற பேருல... ஒரு இனத்தையே இப்படி கேவலமா மாத்திட்டாங்க.
இப்பவும் கெட்டுப்போகல.. உங்க அன்பும் அரவணைப்பும் எங்களுக்கு கிடைச்சா, எங்க மேல இந்த ஈனப் பார்வையெல்லாம் விழாம எல்லாரையும்போல நாங்களும் மனிதர்களா வாழ்வோம்! எங்களுக்கான சந்தோஷம், உரிமை பெத்தவங்களாலயே மறுக்கப்படுவது நியாயமா...?! நீங்க கொடுக்க ஆரம்பிச்சா, மொத்த சமூகமும் தன்னால தரும்.
தருவோமா?!

AvaL Vikatan - December 04, 2009

புன்னகை

2009-07-24T08:49:00.000-07:00

புன்னகை என்ற இந்த மூன்று நிமிட படம் திருநங்கைகளின் வாழ்வில் மகிழ்ச்சியான சில நொடிகளின் பதிவு. திருநங்கை கல்கியால் உருவாக்கப்பட்ட ஒரு அழகிய குட்டிப்படம்.

திருநங்கைகளுக்கு அர்ப்பணம்.

நன்றியினை தெரிவித்துக்கொள்கிறோம்

2009-07-19T00:50:00.000-07:00

திருநங்கைகளின் நலனில் அக்கறைகொண்டு எங்களின் சமூகமேம்பாட்டுக்காக நலவாரியம் அமைத்த தமிழக அரசுக்கும், மாண்புமிகு தமிழக முதல்வருக்கும் எங்கள் நெஞ்சார்ந்த நன்றிகள். நூற்றாண்டுகளாக மிகவும் பின்தங்கிய நிலையில் சமூகத்தின் அனைத்து நிலைகளினும் புறக்கணிக்கப்பட்டு அடிப்படை உரிமைகள்கூட மறுக்கப்பட்டு வந்த ஒரு சமூகத்திற்காக நலவாரியம் அமைத்ததன் மூலம் தமிழக அரசு இந்தியாவின் பிறமாநிலங்களுக்கும், உலக நாடுகளுக்கும் ஒரு பெருமைமிகு முன்னோடியாக திகழ்கிறது.
இருசாரர் பயிலும் அரசு கல்லூரிகளில் விண்ணப்பங்களில் மூன்றாம்பாலின சேர்ப்பு, திருநங்கைகள் ஒவ்வொருவருக்கும் உணவுவிநியோக அட்டை, திருநங்கைகளுக்கு இலவச பால்மாற்று மருத்துவ அறுவை சிகிச்சை, இவ்வாண்டின் மாநில நிதி அறிக்கையில் திருநங்கைகளுக்கு 1 கோடிக்கு தொகுப்புவீடுகள் ஒதுக்கீடு என்று தொடர்ந்து திருநங்கைகள் நலனில் அக்கறைகொண்டு நடவடிக்கை எடுத்துவரும் தமிழக அரசுக்கும், மாண்புமிகு தமிழக முதல்வருக்கும் தமிழகத்தின் அனைத்து திருநங்கைகள் சார்பாக மகிழ்ச்சியினையும், பாராட்டுக்களையும், நன்றியினையும் தெரிவித்துக்கொள்கிறோம்.
தமிழக திருநங்கைகள் மட்டுமின்றி இந்தியாவிலுள்ள அனைத்து மூன்றாம்பாலின மக்களுக்காகவும் பாராளுமன்றத்தில் குரல்கொடுத்து எமது உரிமைபோராட்டத்திற்கு தோள் கொடுத்துவரும் அன்பிற்குரிய பாராளுமன்ற உறுப்பினர் கவிஞர் கனிமொழி அவர்களுக்கு அனைத்து திருநங்கைகள் சார்பாக சகோதரி பவுண்டேஷன் மூலம் எமது உளமார்ந்த நன்றியினை தெரிவித்துகொள்கிறோம்.

அன்புடன்,

கல்கி
இயக்குநர்/நிறுவனர்
சகோதரி பவுண்டேஷன்
(திருநங்கைகள் சமூக, பொருளாதார மேம்பாட்டு தொண்டு நிறுவனம்)
மேற்கு சைதாப்பேட்டை,
சென்னை - 600 015
மின்னஞ்சல்: aurokalki@gmail.com
இணையதள்ம்: www.sahodari.org

‘திருநங்கைகள் மதிப்புக்குரியவர்கள்’ - ‘சகோதரி’யின் கடற்கரை நிகழ்வு

2009-05-15T18:14:00.000-07:00

திருநங்கைகள் குறித்து ஏராளமான சந்தேகங்களும், தவறான புரிதல்களும் பொதுவெளிச்சமூகத்தில் உள்ளன. அவ்வப்போது ஊடகங்கள் சில தவறான செய்திகளை வெளியிடுகின்றன. இந்த முரண்பட்ட செய்திகளால் மக்கள் திருநங்கைகளின்பால் சந்தேகம் கொள்ள வாய்ப்பிருக்கிறது. திருநங்கைகளின் சமூக பொருளாதார மேம்பாட்டுக்காக செய்லாற்றிவரும் ‘சகோதரி’, பொதுமக்களில் கடைக்கோடியினர்கூட சரியாக திருநங்கைகளை புரிந்துகொள்ளவேண்டும் என்ற லட்சியம் கொண்டுள்ளது.

19-04-2009 அன்று மாலை சென்னை மெரினா கடற்கரை காந்திசிலை அருகே ‘திருநங்கைகள் மதிப்புக்குரியவர்கள்’ என்ற தலைப்பில் ஒரு வீதி நிகழ்வை பொதுவெளி அரங்கில் நிகழ்த்தியது ‘சகோதரி’.

‘அடையாளம்’ என்ற வீதி நாடகம், வலி என்ற தலைப்பில் ஒரு கவிதை வாசிப்பு நிகழ்ச்சி மற்றும் ‘திருநங்கைகளை மதிப்போம்! இணையாக நடத்துவோம்!’ என்ற வாசகங்களின் கீழே ஏராளமான பொதுமக்கள் கையெழுத்திடும் நிகழ்வும் நடந்தது. ‘அடையாளம்’ நாடகத்தில் நண்பர் ஸ்ரீஜித்தும் நானும் இணைந்து இயக்கி நடித்தோம்.
கவிதை வாசிப்பு நிகழ்வில் பல இளம் கவிஞர்கள் வந்திருந்து திருநங்கைகள் குறித்து தங்களுடைய கவிதைகளை வாசித்தனர். இந்நிகழ்ச்சியில் பங்கேற்க அதிக அளவில் திருநங்கைகள் வந்திருந்தனர். அவர்களின் பங்களிப்பு இந்நிகழ்ச்சியின் வெற்றிக்கு பெரும் காரணமாக இருந்தது. தோழிகள் மோனல், சந்தியா, ஆல்கா மற்றும் உபாசனா ஆகியோர் மிகவும் உதவினார்கள். காவல்துறையினரின் ஒத்துழைப்பும், பத்திரிக்கை மற்றும் தொலைக்காட்சி நண்பர்களின் ஆதரவும் இந்நிகழ்ச்சிக்கு பெரும் வலு சேர்த்தது. பொதுமக்கள் மிகவும் ஈர்ப்புடன் அமைதியான முறையில் இந்நிகழ்வில் பங்கேற்றனர்.

‘அடையாளம்’ நாடகம் ஓரிரவில் என்னால் இயற்றப்பட்டது. சமூகத்தில் திருநங்கைகள் அனுபவிக்கின்ற அவலங்களை துல்லியமாக விளக்கும் ஒரு முயற்சியாக இந்நாடகத்தை உருவாக்கினேன்.. அவர்கள் பிச்சை எடுப்பதும், பாலியல் தொழில் செய்வதும் எதனால் என்பது குறித்தும், பொது இடங்களில் அவர்களின் செயல்பாடுகள் ஏன் ஏற்றுக்கொள்ளப்படுபவையாக இருப்பதில்லை என்பதுபற்றியும் சரியான விளக்கங்கள் இந்நாடகத்தின்மூலம் தெரியப்படுத்தப்பட்டது.

இந்நிகழ்ச்சியை மக்கள் தொலைக்காட்சி முழுவதுமாக பதிவு செய்தது. ஒருவாரம் கழித்து இந்நிகழ்வு இருமுறை ஒளிபரப்பப்பட்டது என்று அறிந்தேன். மக்கள் தொலைக்காட்சிக்கு எனது நன்றிகள். தினகரன், டைம்ஸ் ஆப் இண்டியா ஆகிய நாளிதழ்கள் படச்செய்தியாக இந்நிகழ்வை வெளியிட்டன. நியூ இண்டியன் எக்ஸ்பிரஸ் இதழ் புகைப்படங்களுடன் சிறப்புக்கட்டுரை வெளியிட்டிருந்தது. கடற்கரையில் நடந்த திருநங்கைகளின் இந்த எளிய நிகழ்வு ஒரு முக்கியப்பதிவாகும்.
இதோ சில புகைப்படங்கள் :

From Transwomen, the respectables - Hunt for Dignity

மேலும் புகைப்படங்கள் இங்கே>>>

Transwomen, the respectables - Hunt for Dignity

சகோதரியின் ஞாயிறு நிகழ்வில் பங்கேற்பீர்!

2009-04-17T09:34:00.000-07:00

அன்புள்ள நண்பரே,
சகோதரியின் ஞாயிறு நிகழ்வில் பங்கேற்பீர்!

--------------------------------------------------------------

திருநங்கைகள்
மதிப்பிற்குரியவர்கள்

--------------------------------------------------------------
திருநங்கைகள் குறித்த ஒரு பொது நிகழ்வு

நாள் : ஏப்ரல் 19, ஞாயிறு மாலை 5 மணிக்கு மெரீனா கடற்கரை காந்தி சிலை அருகில்

நிகழ்ச்சி நிரல்

அடையாளம்
திருநங்கைகள் வாழ்க்கை குறித்த ஒரு வீதி நாடகம்

வலி
கவிதைகள் வாசிப்பு

மற்றும்
திருநங்கைகளின் வாழ்வாதார உரிமைகளை ஆதரிக்கும பொதுமக்களிடம் கையெழுத்து இயக்கம் .

மாணவர்கள், சமூக ஆர்வலர்கள், ஊடக நண்பர்கள் மற்றும் திருநங்கைகள் பங்கேற்கவுள்ளனர். அனைவரும் வாரீர்!

நிகழ்ச்சி ஏற்பாடு: சகோதரி

******************************************************************************

பத்திரிக்கையாளர்களுக்கு ஒரு விளக்கம் ..

2009-04-10T07:39:00.002-07:00

திருநங்கைகள் யாரையும் கட்டாயப்படுத்தி பெண்ணாக மாற்றுவதில்லை. தான் பெண்ணாக மாறி வாழ வேண்டும் என்று விரும்பி வரும் அரவானிகளைத்தான் பல சோதனைகளுக்குப்பின் அரவானி குடும்பததில் சேர்த்துக்கொள்வார்கள். தொடர்ந்து அந்த நபர் நிர்வாணம் என்றழைக்கப்படும் ஆணுறுப்பு நீக்க அறுவை சிகிச்சை செய்துகொள்ள வேண்டும் என்று விரும்பி தொந்தரவு செய்தால்தான் பால் மாற்று அறுவை சிகிச்சைக்கு சம்மதிப்பார்கள். அரவானியாக அறியப்பட்டவர்களை கட்டாயப்படுத்தி யாரும் அறுவை சிகிசசை செய்வதில்லை.

பெண்தன்மை கொண்ட ஆண்குழந்தைகளை நம் குடும்ப கட்டமைப்புகள் ஏற்றுக் கொள்ளாமல் இருப்பதால், இந்த சமூகம் அத்தகைய குழ்ந்தைகளை கேலி கிண்டல் செய்து துன்புறுத்துவதால் அத்தகைய குழ்ந்தைகள் மனதளவில் பெரும் பாதிப்புக்கு ஆளாகின்றனர். அவர்களுக்கு முறையான கவுன்சலிங் தருவதற்கான ஏற்பாடுகள் இங்கு இல்லை. அத்தகைய குழ்ந்தைகள் வீட்டை விட்டு பெரும்பாலும் வெளியேறிவிடுகின்றனர். இதனால்தான் அவர்கள் பாதை மாறும் சூழ்நிலை ஏற்படுகின்றது. பெற்றவர்கள் தங்கள் குழ்ந்தைகளை வீட்டைவிட்டு விரட்டாமல் அவர்களை புரிந்துகொண்டு ஏற்றுக்கொண்டால் இக்குழந்தைகள் வாழ்க்கை சீரழியாது. அரவானிகள் பெரும்பாலானவர்கள் அப்படி வீட்டை விட்டு துரத்தப்பட்டவர்கள் அல்லது தாமே வெளியேறியவர்கள்தான்.

பொதுவாக திருநங்கைகள் பொதுவெளி சமூகத்தின் ஒரு அங்கமாக வாழ விரும்புகின்றனர். ஆண்களில், பெண்களில் தவறு செய்பவர்களைப்போல திருநங்கைகளில் யாரேனும் ஒருவர் தவறுசெய்ததாக அறியப்பட்டால் அதற்காக ஒட்டுமொத்த திருநங்கைகளையும் பழிப்பது சரியாகாது. திருநங்கைகள் சமூகத்திலும் அதிகாரம், பணபலம் உள்ள மிகச்சிலரால் பல திருநங்கைகள் கொடுமைகளுக்கு ஆளாகின்றனர். பாதிக்கப்பட்டவர்களுக்கான பாதுகாப்பை சட்டம்தான் வழ்ங்கவேண்டும்.

பொதுவாக திருநங்கைகள் ஏதாவது குற்றம் சாட்டப்பட்டு கைது செய்யப்பட்டால் அவர்களை பெண்களுக்கான சிறையில்தான் அடைக்கவேண்டும். ஆண்களுக்கான சிறையில் அடைக்கும்போது அவர்கள் பாலியல் வன்முறைக்கு மட்டுமின்றி, பாதுகாப்பின்மைக்கும் மன உளைச்சலுக்கும் ஆளாகின்றனர். இதை கவனத்தில்கொள்ளவேண்டும். கைது செய்யப்பட்டால் திருநங்கைகளை பெண்களுக்கான சிறையில்தான் அடைக்கவேண்டும்.

திருநங்கைகளின் வாழ்வாதார பிரச்னைகளை உங்கள் கட்டுரைகளின் மூலமாகவும், செய்திகள் மூலமாகவும் வெளியிட்டு மக்கள் மத்தியில் மிகப்பெரிய புரிதலையும், ஏற்றுக்கொள்ளலையும் ஏற்படுத்தி இருக்கிறீர்கள். பல்வேறு காலகட்டங்களில் எங்கள் போராட்டங்களுக்கும் துணையாய் இருந்திருக்கிறீர்கள். உதாரணமாக, ஈழத்தமிழர்களுக்கான எங்கள் உண்ணாநிலை நோன்பின்போது மிகப்பெரிய ஆதரவை தந்து செய்தி வெளியிட்டிருக்கிறீர்கள். அதற்கு எங்களுடைய நன்றியை தெரிவித்துக்கொள்கிறோம் .

தற்போது திருநங்கைகள் பற்றி ஒரு சம்பவத்தின் அடிப்படையில் செய்திகள் வந்துகொண்டிருப்பதால் பொதுமக்கள் திருநங்கைகள் அனைவரையும் தவறாக புரிந்துகொள்ள வாய்ப்புண்டு. சமூகத்தில் தங்களது அடிப்படைத்தேவைகளுக்கே போராடிக்கொண்டிருக்கிற திருநங்கைகளுக்கு சமூக அங்கீகாரம் தேவை என்பதை நீங்கள் அறிவீர்கள். மேலும் திருநங்கைகளுடைய உரிமைப்போராட்டத்தில் இதுபோன்ற ஊடகச்செய்திகள் சோர்வடையச்செய்கின்றன. இதை கருத்தில்கொண்டு செய்திகள் வெளியிடுமாறு பத்திரிக்கை நண்பர்களை அன்புடன் கேட்டுக்கொள்கிறோம்.

தமிழ் திரைப்பட இயக்குநர்களுக்கு ஒரு கோரிக்கை..

2008-12-26T04:18:00.000-08:00

தமிழ் திரைப்பட இயக்குநர்களுக்கு கல்கியின் கோரிக்கை என்னவென்றால்....

தமிழக அரவானிகளின் உண்ணாநிலை ஒப்பாரி போராட்டம் - ஒரு வரலாற்று சம்பவம்..

2008-12-12T01:39:00.000-08:00

இலங்கையில் தற்போது நடைபெற்றுக்கொண்டிருக்கும் போரில் ஏராளமான தமிழர்கள் கொல்லப்படும் அவலம் எங்கள் திருநங்கையர்களை கவலைகொள்ள வைத்திருக்கிறது. ஏராளமான பெண்களும், குழந்தைகளும் கொல்லப்படுகிறார்கள் என்பதை நினைக்கும்போது இதயத்தை பிடுங்குவதுபோல் ஒரு உணர்வு. போரின் கொடுமைகளை செவிவழியாக கேட்கும்போதே மனம் நடுங்குகிறது, வலிக்கிறது.

இதுவரை எங்களுடைய அடிப்படை உரிமைகள், தேவைகளுக்காக குரல் கொடுத்துக்கொண்டிருந்த நாங்கள் முதன்முறையாக ஒரு மிகப்பெரிய போராட்டமாக கடந்த பலவருடங்களாக இருந்துகொண்டிருக்கும் நமது தமிழீழ சகோதர சகோதரிகளுக்காக ஒரு உண்ணாநிலை ஒப்பாரி போராட்டம் ஒன்று சென்னையில் கடந்த டிசம்பர் 8 ந்தேதி நானும் எனது திருநங்கை சகோதரி பிரியா பாபுவும் இணைந்து நடத்தினோம்.

போரை நிறுத்த வலியுறுத்துவதுதான் எங்கள் போராட்டத்தின் முக்கிய நோக்கம். நாங்கள் உண்ணாநிலையில் இருந்தால்மட்டும் போர்நின்று விடாது என்பதை நாங்கள் நன்றாகவே அறிவோம். ஆனால் அரவானிகள் இத்தகைய ஒரு போராட்டம் செய்யும்போது ஒரு சின்ன அதிர்வாவது ஏற்படும் அல்லவா? அதற்காகத்தான்.

மேலும் தமிழர்களின் முக்கிய பிரச்சனை இது. ஈழ போராட்டத்தை, தமிழர் படும் பாட்டை நன்றாக நன்றாக அறிந்துவைத்துள்ளோம். எங்களுக்கு அதன் கவலை உண்டு. அதற்கான அரவானிகளின் பதிவு மிக தேவை . அதை நன்றாகவே பதிவு செய்தோம் நாங்கள். எங்களின் இந்த உண்ணாநிலை போராட்டத்திற்கு கனிமொழி அவர்களும், திரு. ஜெகத் கஸ்பர் அவர்களும் மிக உதவினார்கள். அவர்களுக்கு எங்கள் நன்றிகள். திருநங்கைகள் நலனில் மிகுந்த அக்கறை கொண்டவர்கள்.

ஈழத்தமிழர்களை நாங்கள் ஆதரிக்கிறோம். போரை எதிர்க்கிறோம். எங்கெல்லாம் தமிழினம் உள்ளதோ அங்கெல்லாம் அமைதி தழைக்க வேண்டும்.

திருநங்கைகளுக்கு இலவச கல்வி வேண்டும்..

2008-10-08T20:37:00.000-07:00

தெருவுக்கு தெரு திருநங்கைகள் பிச்சை கேட்கும் போக்கு மிகவும் அதிகரித்துவிட்டது. நான் சமீபத்தில் சில புத்தக நகல்கள் எடுப்பதற்காக ஒரு கணினி சேவை மையத்திற்கு சென்றிருந்தேன். அழகான ஒரு திருநங்கை அந்த சேவை மையத்திற்கு முன்னால் வந்து நின்று கொண்டார். நானும் ஒரு திருநங்கை என்று அவரால் கண்டுபிடிக்க முடியவில்லை. அந்த சேவை மைய உரிமையாளர் பத்து ரூபாய் ஒன்றை அவருக்கு பிச்சை பணமாக கொடுத்தார். அவர் மனம் உவந்து கொடுக்கவில்லை. அந்து திருநங்கை இடத்தை காலி செய்தால் போதும் என்பதுதான் அவர் மனநிலை. இன்று இப்படித்தான் திருநங்கைகளின் நிலை இருக்கிறது.

ஒவ்வொரு கடையிலும் ஆள் மாற்றி ஆள் என குறைந்தது மூன்று திருநங்கைகள் பிச்சை கேட்டு ஒரு நாளில் வருகின்றனர். சில சமயங்களில் கூட்டாக நான்கைந்து பேரும் வருவதுண்டு. கடைக்காரர்கள் பெரும்பாலானவர்கள் மனமுவந்து கொடுப்பதில்லை. என் இவர்கள் பிச்சை எடுக்கின்றனர்? வீட்டு வேலை செய்யலாம்? எத்தனையோ வேலை இருக்கின்றதே என்று பலர் கேட்கின்றனர். அப்படிக்கேட்பவர்களிடம் நான் ஒன்றுதான் கேட்பேன். உங்கள் வீட்டில் வேலைக்காரியாகவாவது ஒரு திருநங்கையை ஏற்றுக்கொள்வீர்களா?

இந்த சமூகம் திருநங்கைகளை ஏற்றுக்கொள்ள இன்னும் தயங்கிகொண்டுதான் இருக்கிறது. வீட்டு வேலைக்காரியாகக்கூட ஏற்றுக்கொள்ளத்தயங்குகின்றனர். எனவேதான் பிச்சை எடுப்பதும் பாலியல் தொழில் செய்வது மட்டுமே திருநங்கைகளால் இயல்கிறது. திருநங்கைகளுக்கு கல்வி முக்கியம். அரசும் அரசு சாரா தனியார் கல்வி நிறுவனங்களும் திருநங்கைகளுக்கு இலவசக்கல்வி வசதியை ஏற்படுத்திக்கொடுக்க வேண்டும். கல்வி ஒன்றுதான் அவர்கள் வாழ்வை உயர்த்தும்.

திருநங்கையர் வாழ்வு மலர அரசு என்ன செய்ய வேண்டும்?

2008-09-25T02:54:00.000-07:00

என் தோழி மோனல் மற்றும் என் குரு அப்சரா ஆகியோருடன் ஒரு கலந்துரையாடல். திருநங்கைகளின் வாழ்வு உயர அரசு என்ன செய்ய வேண்டும் என்பது குறித்து எங்களுடைய உரையாடல்.

என் நடனம்.. என் வாழ்க்கை..

2008-09-10T18:45:00.000-07:00

இந்த நடனம் யூ ட்யூபில் பிரபலமாக இருக்கும் ஒரு ஒளிப்படம். ஆரோவில்லில் நான் வாழ்ந்தபோது என்னால் பதிவுசெய்யப்பட்டது. எனக்கு மிகவும் பிடித்த எனது பதிவுகளில் ஒன்று. ஒரு சந்தோஷமான பெண் இபடித்தான் இருப்பாள் என்று நினைக்கிறேன். காட்டாறுபோல், பறவைபோல்.

சென்னையில் ஒரு வீடு ...

2008-08-24T22:00:00.000-07:00

சென்னைக்கு வந்தபின் என் அலுவலகம் இருக்கும் சைதாபேட்டை பகுதியில் இரண்டு நாட்களாக ரோஸின் ஸ்கூட்டி பெப்பில்அலைந்துகூட வீடு கிடைக்கவில்லை. ஒரு வீட்டில் திருநங்கை என்று தெரிந்ததாலேயே வீடு மறுக்கப்பட்டேன். மனம் வெதும்பி இருந்தவேளையில் ரோஸ் ஆறுதல் சொன்னதுமட்டுமல்லாமல் என்னை உற்சாகப்படுத்தினாள்.

கடைசியாக நேற்று மாலையில் ஒரு இரண்டுமாடி கட்டிட வீட்டில் மொட்டைமாடியில் ஒரு சிறிய வீடு கிடைத்தே விட்டது. கல்கி திரைப்படத்தில் கல்கி தங்கியிருப்பாளே அதுபோல ஒரு வீடுதான்.

வீட்டு உரிமையாளரிடம் நான் திருநங்கை என்று சொல்லவில்லை. அந்த அவசியமும் ஏற்படவில்லை. பின்னொருநாள் அவர்களே கண்டுகொள்வார்கள். அப்போது பார்க்கலாம். அதன்பிறகு பிரியாபாபுவை சந்தித்துவிட்டு ஆட்டோவில் என் அலுவலத்திற்கு வருவதற்குள் அந்த ஆட்டோவை ஓட்டிவந்த இரண்டு பேரில் ஒருவன் கையை நீட்டி என் காலை வருடுவதும் என்னை தடவ முயற்சிப்பதுமாக இருந்தது என்னை அதிர்ச்சியடைய வைத்தது. சட்டென்று என் அலுவலகம் வர இறங்கிக்கொண்டேன். சண்டை போட்டிருக்கலாம். ஆனால் நான் சண்டைபோடவில்லை. மிகப்பெரிய மாற்றங்களுக்கு விதைபோடும் சமயத்தில் இந்தமாதிரி மனிதர்களிடம் என் சக்தியை சிதறடிக்க விரும்பவில்லை.

இனி சென்னைவாசி நான் ..

2008-08-08T05:08:00.001-07:00

இந்த மாதம் மூன்றாவது வார இறுதியில் சென்னைக்கு குடி பெயர்ந்துவிடுவேன். என் சொந்த ஊர் பொள்ளாச்சி - நகரமும் கிராமமும் இணைந்த ஒரு கலவை. என் ஊர் அழகின் இலக்கணம் . இந்த ஊரிலிருந்து அங்கு செல்ல எனக்கு சற்றே சற்று தயக்கம் இருந்தாலும் இந்த மாற்றம் அற்புதங்கள் நிகழ்த்தும்.

சென்னையில் நல்ல வீடு கிடைப்பது மிகவும் அரிது என்று எனக்குத்தெரியும். திருநங்கைகளுக்கு மிகமிக அரிது எனவும் எனக்குத்தெரியும். நான் அதிர்ஷ்டக்காரி. சென்னையில் எனக்கு தோழிகள் நல்ல நண்பர்கள் அதிகம். நான் கொடுத்து வைத்தவள். இரண்டே நாட்களில் எனக்கென்று வீடு அமையும்.

தமிழ் செல்வந்தர்களுக்கு ஒரு கோரிக்கை...

2008-07-12T05:18:00.000-07:00

இந்தியாவிலேயே முதன்முறையாக திருநங்கைகளுக்காக தொடங்கப்பட்டு
நிதிஉதவி ஏதும் இல்லாததால் நின்று போன எனது 'சகோதரி' பத்திரிக்கையை மீண்டும் தொடரவேண்டும்.

திருநங்கைகளின் வாழ்வாதார பிரச்சினைகள், தீர்வுகள், அவர்தம் படைப்புக்களையும் தாங்கிவந்த இந்த சிற்றிதழ் நின்றுபோனது என்னை மிகவும் கவலைக்குள்ளாக்கியது. 'சகோதரி' மீண்டும் உயிர்பெற வேண்டும்.

பொம்மைகளுடன் விளையாடுவேன் !

2008-06-29T05:10:00.000-07:00

பள்ளிப்பருவத்தில் நிறைய பொம்மைகளுடன் விளையாட மிகவும் ஆசைப்பட்டிருக்கிறேன். ஆனால் அப்பா எனக்கு கேட்டதெல்லாம் வாங்கிக்கொடுத்தாலும் பொம்மைகள் மட்டும் நிறைய வாங்கித்தரமாட்டார். அப்போதுவிளையாடிய பொம்மைகளில் இப்போது என் நினைவுகளில் உள்ளதெல்லாம் ரயில் பொம்மையும், துப்பாக்கி பொம்மையும்தான். சாவி கொடுத்தால் ஆடும் குரங்கு பொம்மை, காற்றடைத்த வாத்து பொம்மை, பஞ்சு பொம்மை, பாபி பொம்மை என்று நான் ஆசைப்பட்டதெல்லாம் எனக்கு கிடைக்கவில்லை. இப்போது அவற்றுடன் விளையாட ஆசையாய் இருக்கிறது. வெட்கப்படாமல் ஒவ்வொன்றாக வாங்கி கண்டிப்பாக விளையாடுவேன்.

தமிழக அரசுக்கு நன்றி.... இப்போதைக்கு..

2008-05-18T07:33:00.000-07:00

'திருநங்கை' என்ற மூன்றாம் பாலின பிரிவை சேர்த்துக்கொள்ள ஆணை பிறப்பித்த தமிழக அரசுக்கு மனமார்ந்த நன்றிகள். பல ஆண்டுகளாக திருநங்கைகளின் வாழ்வுரிமைக்கான போராட்டம் என்பது பல அவமானங்கள், புறக்கணிப்புக்கள், ஏமாற்றங்களை தாண்டியும், தாங்கியும்தான் நடந்துவருகிறது.

இதில் பிரியாபாபு, ஆஷாபாரதி போன்றவர்களின் அரும்பணி குறிப்பிடத்தக்கது. இருவரும் சட்டத்தோடு போராடியிருக்கிறார்கள். மேலும் பலர் முக்கியப்பணி ஆற்றியிருக்கிறார்கள். இன்னும் திருநங்கைகளின் உரிமைக்கான போராட்டம் தொடர்ந்துகொண்டுதான் இருக்கிறது.

ஆனால் ரோஸ் மற்றும் என்னுடைய வழிகள் முற்றிலும் வித்தியாசமாக இருக்கும். சாதனைகள்தான் வெற்றிகளையும் மாற்றங்களையும் மகுடங்களாக சூட்டும் என்பதை இருவரும் அறிவோம். அதற்காக உழைக்கிறோம். மாற்றங்களை மக்கள் மனதில் உருவாக்குகிறோம்.

தமிழக அரசுக்கு நன்றி.... இப்போதைக்கு..

புலிகள்... பிரபாகரன்....

2008-04-24T01:08:00.000-07:00

தமிழீழ விடுதலை பற்றி எழுதவேண்டும் என்று வெகுநாட்களாக நினைத்துக்கொண்டிருந்தேன். தமிழர்கள் அங்கே கொல்லப்படும்போது இங்கேஅமர்ந்து யாகூவில் அரட்டை அடிக்கும் யுவதிகளில் நானும் ஒருத்தி என்று வெட்கத்துடன் கூறிக்கொள்கிறேன். பள்ளிப்பருவத்தில் பிரபாகரனின் புகைப்படத்தை முதன்முதலில் பார்த்தபோது அவர் கன்னத்தில் முத்தம் கொடுத்து ஒரு சல்யூட் அடிக்க ஆசைப்பட்டிருக்கிறேன். எனக்கு தெரிந்த ஒரே வீரத்தமிழன் அப்போது அவர்தான். தீவிரவாதத்தில் எனக்கு நம்பிக்கை இல்லை. துப்பாக்கி விடுதலை தரும் என்று என்றும் நான் நம்பியதில்லை. அமைதிப்பேச்சுவார்த்தை ஒன்றே தீர்வு தரும் என்பது எனது கருத்து. எத்தனை ரத்தங்கள, எத்தனை படுகொலைகள்... ஈழத்தில் பெண்களும், குழந்தைகளும் கற்பழிக்கப்பட்டு கொலைசெய்யப்படும் நிகழ்வுகள் கற்பனைக்கெட்டாத சோகங்கள்.

ராஜீவ் காந்தி கொல்லப்பட்டபோது நானும் கோபப்பட்டேன். பிரபாகரன் இந்தியர்களின் முதுகில் குத்திவிட்டார் என்று அப்போது நினைத்தேன். பிரபாகரன் செய்தது சரியா தவறா என்று கேட்டால் ஒரு தமிழச்சி என்பதால் சரி என்பேன். ஒரு இந்தியப்பெண் என்பதால் தவறு என்பேன். தமிழர் எண்ணம் அதுதான்.

பெண் புலிகளை பற்றி நிறைய தெரிந்துகொள்ள விரும்புகிறேன். அவர்கள் ஆயுதம் தொட காரணம் என்ன? அவர்கள் வாழ்வில் நடந்த துயரங்களா அல்லது மண்ணின் மேல் உள்ள பற்றா? பெண்மையின் மென்மை அவர்களிடம் இன்னும் உண்டா? ஒரு திருநங்கையும் ஒரு பெண் புலியும் சந்தித்தால்....

ரோஸ் கல்கி நட்பு..

2008-04-17T22:36:00.000-07:00

ரோஸ் விஜய் டிவியில் 'இப்படிக்கு ரோஸ்' என்ற நிகழ்ச்சியை வழ்ங்குகிறாள். சென்ற வாரம் ஒரு முக்கிய திருநங்கைகள் சந்திப்பில் ரோசும் நானும் சந்தித்தோம். திருநங்கைகளின் வாழ்வில் பெரிய மாற்றங்கள் கொண்டுவருவதற்கான சந்திப்பு. பல முக்கிய விஷயங்களை பற்றி விவாதித்தோம். சந்தித்த நிமிடம் முதல் இரண்டு நாட்கள் பிரியவில்லை. பீச், ஷாப்பிங், சும்மா பெப் வண்டியில் ஊர் சுற்றுவது என்று மிக மிக ரசித்தோம் ஒவ்வொரு நிமிடமும்.

இரவுகளில் பெண்கள் சென்னையில் தனியாக பயணிக்க முடியாது என்று அப்போதுதான் அறிந்துகொண்டேன். இரண்டு சக்கர வண்டியில் எங்களால் தனியாக போகமுடியவில்லை. ஆண்களின் கிண்டலும், அழைப்புகளும் என்னை அதிர்ச்சியில் ஆழ்த்தியது என்றால் ரோஸ் மிகவும் கோபப்பட்டாள். ஒரு இடத்தில் ஐம்பது வயது மதிக்கத்தக்க ஒரு ஆள் எங்களை வெகுதூரம் தொடர்ந்துவந்தது மிகுந்த வேதனையை உண்டாகியது. ரோஸ் அந்த ஆளை அடிக்காத குறைதான். இருவரும் கண்டித்து அனுப்பினோம். . ஆண்கள் இத்தனை வெறியோடு அலைகிறார்கள் என்று நினைக்கும்போது பயமாகத்தான் இருக்கிறது.

உறவுகள் முறிவுகள் பிரிவுகள்..

2008-03-29T23:39:00.001-07:00

நட்பு. ஒரு தெய்வீகமான உணர்வு. நட்பில் விளையும் நேசம் ஒரு அற்புதம் அல்லவா? அதற்கு ஈடு இணை எது? என் நண்பர்கள் என் உயிரில் கலந்தவர்கள். ஆனால் நான் என்னை நானாக மாற்றிக்கொண்ட பிறகு நான் மிகவும் நேசித்த சிலர் என்னை விட்டு விலக ஆரம்பித்தனர். என் இதயத்தில் அவர்கள் வாளைச்சொருகிய் நிகழ்வுகள் உண்டு. வலிகள் தரககூடிய அந்த நினைவுகள் சில சமயங்களில் என்னை தின்னதொட்ங்கும்.

என் கடமைகளில் முதன்மை

2008-03-29T04:02:00.000-07:00

எனது கடமைகள் எங்கே என்பதை நான் தெளிவாக அறிந்துள்ளேன் திருநங்கைகள் மற்றும் பாலினத்தால் மாறுபட்டவர்கள் பற்றிய விழிப்புணர்வு இளைஞர்கள் மத்தியில் ஏற்படுவது மிக மிக அவசியம். ஏனெனில் நாளைய தலைவர்கள் அவர்கள்தான். இந்த நாட்டின் சட்டம், அரசியல், கொள்கைகள் இவற்றை நிர்ணயிக்கப்போவது அவர்கள்தான். அவர்கள் நெஞ்சங்களில் உள்ள அறியாமை என்ற நஞ்சை அகற்றி உண்மை என்ற மருந்தை புகட்டுவது என் கடமை. இதில் சவால்கள், அவமானங்கள், இனிய அனுபவங்கள் எல்லாமே நேரக்கூடும் என்பதை நான் நன்றாகவே அறிந்துள்ளேன்.

கல்லூரிகள், பல்கலைகழகங்களுக்கு செல்கிறேன். மேலும் பல கருத்தரங்கங்களுக்கும் செல்வேன். எழுத்துக்களை வாசிக்கும் இளைஞர்கள் எத்தனைபேர் என்று தெரியவில்லை. எனவே நேருக்கு நேர் சந்திப்புகளும், உரையாடல்களும், செமினார்களுமே ஆரம்பத்தில் மாற்றங்களின் அசைவுக்கு உதவும். குறிப்பாக சமூகவியல், சமூகசேவை பற்றிய பாடங்கள் படிக்கும் மாணவர்களுக்கு இந்த விழிப்புணர்வு மிகவும் தேவை.

அனுதாபமும், பரிதாபமும் அவர்களிடமே இருக்கட்டும்..

2008-03-24T23:03:00.001-07:00

திருநங்கைகள் மேல் அனுதாபமும், பரிதாபமும் கொள்வது தேவையற்றது என்பது என் கருத்து. எங்களுக்குரிய உரிமைகளை தரவேண்டும். கேலி செய்யும் கூட்டம் ஒரு பக்கம் என்றால், பரிதாபப்பட்டு எங்களின் சக்தியை முடக்கும் மனிதர்களும் உண்டு. எங்களை சமமாக மதிக்கவேண்டும். சகமனுஷி என்ற உணர்வு இருந்தாலே போதும். பரிதாபப்படுவதால் என்ன நன்மை?

துன்பப்படும் நங்கைகளுக்கு உதவவேண்டும். ஆனால் இரப்பவர்க்கு அல்ல. வணிகத்தலங்களில் கைதட்டி பிச்சை எடுப்பவர்களின்மேல் எனக்கு கோபம் உண்டு. பலர் பயந்துதான் பணம் கொடுக்கிறார்கள். அவர்களின் அந்த பயமே வெறுப்பாக மாறுவதையும் பார்த்திருக்கிறேன். வேதனைப்பட்டிருக்கிறேன். ஆனால் பிச்சை எடுக்கும் நங்கைகள் சொல்லும் காரணமும் சரியானதுதான். சமூகம் வேலை அளிப்பதில்லை. தள்ளிவைத்து பயத்துடன்தான் பார்க்கிறது. மாற்றங்கள் சமூகத்தில்தான் முதலில் தேவை. பிறகுதான் திருநங்கைகளிடம்.

படித்தவர்களின் கடமைகள் நிறைய உண்டு. எங்களில் படித்தவர்களை பற்றித்தான் சொல்கிறேன். நாங்கள் நல்ல ரோல் மாடல்கள் ஆனால்தான் மாற்றங்கள் பலப்படும்.

எது பெண்மை?

2008-03-24T09:51:00.000-07:00

திருநங்கை என்பதாலேயே பூவும், புடவையும் உடுத்தி அச்சம், நாணம், மடம் மற்றும் இன்ன பிற சங்கதிகள் இருக்கவேண்டும் என்று பலர் என்னிடம் சொன்னதுண்டு. ஏன்.. என் உயிர் தோழர்கள்கூட என்னிடம் சொன்னதுண்டு. அதை அப்படியே நான் ஏற்றுக்கொண்டதில்லை. பெண்மை என்பது அடக்கமும், அழகும் அல்ல.

பெண்மை என்பது வல்லமை, ஆற்றல், அறிவு... உடையும், நடையும் வெறும் பாவனைகள். பெண்மை என்பது சிகரம், சுதந்திரம், தூய்மை.

ஷேக்ஸ்பியர் நாயகியாக நான்..

2008-03-15T04:27:00.000-07:00

ஹாம்லெட் ஆங்கில நாடகத்தில் நடித்தது ஒரு இனிய அனுபவம் மட்டும் அல்ல. எனது கலை வாழ்வில் ஒரு அற்புத துவக்கம் என்பேன். முதல் மேடை அனுபவமே ஷேக்ஸ்பியர் அமைவது அதிர்ஷ்டம்தான். ஆரோவில் எனக்களித்த அற்புதங்களில் இந்த நடிப்பனுபவமும் ஒன்று. அதுவும் இரட்டை வேடம்.

ஆரோவில் நாடகக்குழுவின் இயக்குனர் ஜில் அமெரிக்க பெண்மணி. ஆரோவில் வாசியாக பதினைந்து வருடமாக இங்குதான் வசிக்கிறார். மேலே மஞ்சள் உடையில் இருப்பது அவர்தான். திறமையும், அனுபவமும் உள்ளவர். என்மீது மிகுந்த அன்பு கொண்டவர். அவரிடன் நாடகத்துறை குறித்து நிறைய கற்றுக்கொண்டேன். திருநங்கைகள் பற்றிய தயக்கம் நமது ஊரில் மட்டும் இல்லை, வெள்ளைகாரர்களிடமும் உண்டு. எங்கள் குழுவில் முதலில் சிலரிடம் அந்த தயக்கம் இருந்தது. சில நாட்களிலேயே என்னுடன் பழகியதும் அந்த தயக்கம் நீங்கியது.

ஆறு மாதங்கள் ஒத்திகை பார்த்தோம். ஜனவரியில் மேடை ஏற்றம். அனைவரும் சிறப்பாக செய்தோம். ஆரோவில் சர்வதேச நகரம் என்பதால் இந்த நாடகத்தில் நடித்த அனைவருமே பல நாடுகளைசேர்ந்தவர்கள். அமெரிக்கா, இங்கிலாந்து, பிரான்சு, ரஷ்யா நாடுகளை சேர்ந்த ஆரோவில்வாசிகள் என் சக நடிகர்கள்.

அடுத்து சிகன்டியின் கதை. இரண்டு வருடம் கழித்து அதை நான் செய்யக்கூடும்.

தமிழ் திருநங்கைகள் நாங்கள்..

2008-03-14T04:36:00.000-07:00

இந்த மார்ச் மாதம் மூன்றாம்தேதி வெளியான தி சண்டே இந்தியன் இதழில் மூன்றாவது குரல் என்ற தலைப்பில் சாதித்துக்கொண்டிருக்கும் திரு நங்கையர் பற்றி கவர் ஸ்டோரி எழுதியிருந்தார்கள் . ஆஷா பாரதி , ப்ரியா பாபு , ரோஸ் , அல்கா , லக்ஷ்யா , நர்த்தகி மற்றும் என்னுடைய பேட்டியும் வந்திருந்தது. லிவிங் ஸ்மைலின் கட்டுரை அருமை. அவளை விரைவில் சந்திப்பேன்.

எங்கள் பிரச்சனைகளை மிகவும் தெளிவாக பாரபட்சமின்றி எழுதியிருந்தனர் தோழர் பழனியப்பன் மற்றும் அவரின் குழுவினர். படித்து மகிழ்ந்தேன் . தமிழ்கத்தில் புரட்சிகரமான மாற்றங்கள் வருவது மகிழ்ச்சி அளிக்கிறது. எனினும் பெறவேண்டிய உரிமைகள், ஆற்றவேண்டிய கடமைகள் நிறைய உள்ளன. எனது பாதை வேறு. நான் இளைஞர்கள், இளம் பெண்கள் மத்தியில் திருநங்கைகள் பற்றி உள்ள தவறான அபிப்ராயங்களை தகர்க்க நினைக்கிறேன். அதற்காக சில திட்டங்களை வகுத்துக்கொண்டிருக்கிறேன். அவற்றை ஒவ்வொன்றாக செயல்படுத்துவேன்.

சகோதரியின் வணக்கம் !

2008-03-13T10:42:00.000-07:00

அன்புத்தமிழ் பேசும் அத்துணை பேருக்கும் என் வணக்கங்கள். நான் கல்கி. தமிழ்த்திருநங்கை. இணையத்தில் தமிழில் எழுதும் என் முதல் முயற்சி இது. திருநங்கை என்பதாலேயே பல அனுபவங்கள், மகிழ்வுகள், நெஞ்சை கிழிக்கும் ஏமாற்றங்கள் உண்டு.

ஆனால் அவற்றையும் தாண்டி லட்சியச்சுடரோடு இங்கு வந்திருக்கிறேன். மீண்டும் நாளை சந்திக்கிறேன்.

-கல்கி-